بعد ما عرضنا لحضراتكم موضوع الدراسة والمنح فى إيطاليا “اضغط هنا“
وكمان عرضنا لحضراتكم إزاى تدرسوا فى الجامعة فى إيطاليا بعد دراسة الثانوية العامة فى مصر “اضغط هنا“
إنهاردا إن شاء الله هنتكلم عن إيجاد وظيفة بعد الدراسة فى إيطاليا.
الكلام اللي هنا ممكن يكون صح في بعض النقاط وممكن يكون غلط لأنه من واقع خبرتي الشخصية يعني أنا بكتب اللي شوفته، هنا أنا هاتكلم عن الشغل بالنسبة للناس اللي درست هنا أو معاها تخصصات دراسية معينة مش نظام الشغل السائد عند المغتربين اللي هو معمار ونظافة وبيتزاريا وفرن وكده ومحدش يفهمها كنوع من التقليل أو ياخدها بطريقة غلط أنا بس بركز علشان الكلام ده بينطبق على وضع معين.
بالنسبة للشغل هنا في إيطاليا مالهوش معيار مش بس على اساس إنه رزق وكل واحد له رزقه إنما كمان على أساس إن سوق العمل في إيطاليا بيتحكم فيه عوامل كثيرة ، بشكل عام هنا في إيطاليا يعنى مثلاً
القطاع الخاص بيفضل في التعيينات حديثي التخرج واللي واخدين ماجستير لأنهم بالنسبالهم ده السن الطبيعي اللي يبدأوا ياخدوا فيه ناس ويستثمروا فيهم في الوظائف العادية ويكبروا واحدة واحدة ، طبعا لو وظائف أعلى شوية بيطلبوا خبرة وعلى أساس كبير الخبرة والجودة بتاعتها بتحدد مدى القبول،
المشكله عندهم في الدكتوراة لأن بالنسبه ليهم اللي بيكمل يعمل دكتوراة ده شخص ادخل نفسه في تخصصات دقيقة وركز مع البحث العلمي وبالتالي لو هايقارن مع واحد حديث التخرج وفارق السن طبعا بيفضل حديث التخرج وبصراحة كده بيعتبروا اللي عمل دكتوراة وبعدين جه يدور على شغل قطاع خاص دماغه تعبانه لأنه محسبهاش صح من الأول ماعدا في حالة إن الدكتوراة تكون معمولة في تخصص دقيق يخدم الشركة أو الشغل أو كان بيعملها عن طريق منحة ممولة لصالح الشركة دى.
وعلشان كده هاتلاقي نسبه قليلة من الطلبة الإيطاليين بيكملوا ماجستير ونسبة أقل بيكملوا دكتوراة لأن بالنسبة ليهم الشغل أهم. فده أول جانب.
الجانب الثانى اللغة هنا في إيطاليا عندهم بشكل عام الإنجليزي مش قوي واللي بيعرف إنجليزي بيحاولوا يدوروا عليهم بس يكون بيعرف انجليزي كويس والإيطالي أيضا يعني لو معاك انجليزي بس ومستوى الايطالي ضعيف صعب يقبلوا بالذات لو مكان كبير إلا لو الشغل كان محتاج انجليزي فقط ، إنما لو معاك أو بتعرف إيطالي كويس وكمان إنجليزي فده شيء مطلوب جدا.
الجانب الثالث ، ممكن تقابل بعض العنصرية الغير ظاهرة يعني ممكن تقدم والورق يترفض لأسباب وجيهة ان المنافس كان أفضل منك بكثير ولكن الحقيقة الغير معلنة هيا لأنك أجنبي مثلا أو عربي بالأخص أو محجبة فده على حسب وممكن يتقالك بشكل صريح الكلام ده، وممكن تحبط وتحس إن الموضوع فيه حاجه غلط بس مش هاتعرف تمسك عليهم الغلطة ده.
الجانب الرابع ، هاتلاقي أو ممكن تحس إن فيه رفض إنك تشتغل في الوظيفة اللي المفروض تشتغل فيها وبيرضوا يشغلوك في حاجات أقل بكثير من مكانك الطبيعي وهاتكتشف في الأخر إن 90 % من الشغل كان لازم يكون عن طريق معرفة واسطة أو تعامل مسبق وحط تحت تعامل مسبق أكثر من خط.
فالخلاصة واللي أقدر أنصح بيه هو:
- لغة إيطالية، تمكن في الكلام والتعامل بالذات ويفضل لو واخد دورات دراسية و معاها شهاده.
- الانجليزي برضه مع شهادة.
- سيرة ذاتية بسيطة ومركزة ومن رأيي إن الأفضل يتكتب جزء في بدايتها بعد البيانات الشخصية 4 سطور تعريف بهدفك وانت ليه بتقدم على الوظيفة ده ونقاط قوتك تبرزها في السطرين دول ولازم تظبط اكثر من نسخة لان السطرين دول هايختلفوا على حسب المكان ونوع الوظيفة الي هاتقدم فيها. لأن دول السطور الي غالبا هايتقروا في الورق بتاعك.
- يكون عندك خلفية كويسة عن التكنولوجيا والكمبيوتر والإنترنت. ولو فيه شهادات يبقى أفضل.
- التركيزي على التخصصات المناسبة لدراستك او المتكافئة مع نقاط القوة الي عندك واذا قدرت خلال فترة دراستك تتعرف على مين دكاترة عندك في الكلية ليهم في البزنس بره ومعاهم مشاريع او مستشارين لشركات وتتعرف عليهم وتبدأ تسألهم هايسهلوا عليكم كثير وممكن يبعتوا توصية ويظبطوا الدنيا.
- أهم نقطة لازم تبقي متأكد ومؤمن بيها ان الشغل رزق وان الرزق بيحتاج سعي علشان تحصل عليه و ربنا يكرمك بيه.
- بالمناسبة أنا بكتبلك الكلام ده وأنا بقالي فترة بدور على شغل مناسب وملقيتش وده خلاصة اللي بيقابلني علشان تتفادي أي مشكلة إن شاء الله ومتفقدوش الأمل وتأكدوا وثقوا في قدراتكم، وساعدوا الناس ربنا هايكرمكم، وربنا يوفقنا جميعا.
بعض طرق التقديم على الوظائف:
- موقع https://www.linkedin.com وده موقع مهم جدا لأنه بيوصلك بالشركات وال HR فيها وهو عامل زي شبكات التواصل ولكن بشكل محترف وبدون سفه ، ده بيتعمل عليه سيرة ذاتية ولازم تهتم جدا وانت بتعملها بتكتب ايه وازاي ، وتقدر من عليه تشترك في جروبات خاصة بالمجال بتاعك تتعرف من خلالها على الناس الي شغاله نفس المجال وعلى أصحاب الشركات، بدور فيه على الوظائف المتاحة وبتقدر تعرف مين المسؤول عن الإعلان وتراسله شخصيا.
- فيه أبلكيشن على الموبايل اسمه cornerjob https://www.cornerjob.com/it/company ده ميزته انه بيطلب منك مجموعة بيانات شخصية بسيطة جدا و بيظهرلك الوظائف المتاحة في نطاق المحيط الجغرافي لسكنك أو للمكان الي انت محدده وبيوريك الوظيفة ده تبعد عنك قد ايه فتقدر تلاقي وظيفة قريبة على محل سكنك وكمان بيديلك بمجرد التقديم على الوظيفة 48 ساعة عبارة عن مهلة للشركة علشان ترد عليك رد مبدئي سواء بالقبول أو الرفض وتقدر تعمل شات مع صاحب الشركة أو المسؤول عن الإعلان.
- فيه تبع أغلب الجامعات الإيطالية حاليا مكاتب خاصة بربط طلاب الجامعه بسوق العمل وبيطلب منك تسجل بياناتك وتعمل سيرة ذاتية وتقدم بيها في فرص وظائف بينزلها الموقع بشكل يومي وأغلبها طبعا بتكون متخصصه في مجال دراستك لأنك بتعمل فلتر للبحث في مناطق محددة أو تخصصات معينة أو بشهادتك الي حصلت عليها ومثلا في الموقع تبع جامعة ميلانو وأغلب الجامعات اسمه https://www.almalaurea.it/ .
- طبعا فيه مواقع تانيه كثير ومشهورة ولكن أنا مركز في المقال ده عن الحاجات الي بتساعد في مجال التخصص والدراسة بشكل عام.
نسأل الله لنا ولكم التوفيق والسداد ، ونسألكم الدعاء.
