● اشتري شنطة سفر مميزة بألوان مختلفة عن الأسود والبني ولو دي الوان شنطتك لازم تحط استيكر ملون يميز الشنطة.
انا شخصياً شنطتي لونها برتقالي !
. ●بلاش تقفل الشنطة بقفل لكن ممكن تغلفها أفضل.من الإجراءات الامنية المتبعة في اغلب المطارات تفتيش شنط عشوائية بشكل يدوي.
● اكتب بياناتك الشخصية علي الشنطة بالانجليزي ويكون منها رقم داخل دولة الوصول . وكمان بيانات الإتصال في بلدك الأم لحد من أقاربك.
● أي الكترونيات او مجوهرات او ادوية مهمة لازم تكون في الهاند باج. مع حجوزات الفنادق والتذاكر وصورة من الجواز .ويا ريت لو معاك طقم خروج وطقم للنوم في الهاندباج.
● تصوير الشنطة بالموبايل صور واضحة .ممكن تحتاجها لو ضاعت.
● الحذر ثم الحذر ثم الحذر من رحلات الترانزيت القصيرة ،لأن 90% من الشنط المفقودة بتضيع في بلد الوصول “الترانزيت” الأول والحل إنك توصل المطار بدري جدا وتتأكد من موظف الكاونتر إن استيكر الترانسفير موجود وواضح علي الشنطة .
ونحاول مانسافرش علي ترانزيت أقل من ساعتين أو٣ ساعات ويستثنى من الكلام دا طبعا الناس اللى بتعمل ترانزيت فى نفس البلد يعنى مثلا فى إيطاليا واحد مسافر من ميلانو لمصر وعمل ترانزيت فى روما فالموضوع دا عادى مفيهوش مشكلة حتى لو الترانزيت ساعة واحدة.
نيجى بقى لنقطة مهمة جدا وهى “تعمل إيه عشان تستلم شنطة سفرك لحظة وصولك أسرع من جميع الركاب معاك على نفس الرحلة “هذكر نقطتين بيساعدوا فى الموضوع دا :
أولاً : اطلب من الموظف يحط علامة fragile أو قابل للكسر ودى من حركات الصياعة حتى لو الشنطة مفيهاش حاجة تتكسر اطلبها برده ودا عشان تضمن التعامل بإهتمام وإن الشنطة تكون فوق كل الشنط فتستلمها الاول .
ثانيا : حاول تعمل ال check in “الوزن ” علي الكاونتر في أخر وقت ودا بيرفع من إحتمالية نزول شنطك في أول مجموعة شنط حتنزل ع السير.
***********************
طيب لو حصلك اى ظروف واضطريت تنزل مصر فجأة وهتحجز من المطار وحابب تاخد كرسي في مقدمة الطيارة يبقى تحاول تتاخر بقدر الامكان عشان الطيارة بتتوزع كراسيها بترتيب من مؤخرة الطيارة للمقدمة .
***********************
أخيراً بقى لو شنطتنا ضاعت لا قدر الله نتصرف ازاي ؟
مهم جدا نحتفظ بالبوردنج واستيكر الشنط لأن ده المرجع الأهم لشركات الطيران في البحث عن الشنط الضايعة واثبات قانوني لملكيتك ليها.
كل مطار موجود فيه مكتب لشركات الطيران وهناك بتعمل شكوي عن الشنط وبيطلبوا منك رقم ليك في البلد وغالبا بتوصل الشنط علي اول رحلة من بلد السفر وبيتصلوا بيك تروح تاخد شنطك ولو شركة محترمة بتبعتهالك لحد باب بيتك .
