مع تكرار السؤال التالى
” هو أنا لو جيت إيطاليا هشتغل إيه وهل هعرف أعيش وأخبار الأسعار إيه ؟ “
قررنا نعمل موضوع نشرح فيه الشغل والمعيشه فى ايطاليا
مبدأيا الشغل أرزاق وكل واحد له رزقه هيشوفه ودى حاجه بأيد ربنا لكن ربنا امرنا نأخد بالاسباب واللى هنقوله ده هو الاسباب- الشغل فى ايطاليا عبارة عن هيكل مرتبط ببعضه وعشان تبدأ تشتغل محتاج التالى :
1-تصريح إقامة على الأراضى الإيطالية.
2-تتعلم اللغة الإيطالية
3-تتعلم صنعه مطلوبه فى ايطاليا (كبنا-مبيض محاره-طباخ-صنايعى بيتزا-لحام -نجار مسلح -خراط
4-ودى اهم حاجه يكون عندك قرايب او اصدقاء ومعارف يخدموك ويكونوا فعلا يقدروا يخدموك .
لو ربنا كرمك واشتغلت فمتوسط الدخل الشهرى حوالى من 1000ل 1400 يورو ومتوسط المصاريف الشهرية حوالى من 400 ل 800 يورو على حسب مكان سكنك وانت قاعد مع كام واحد وطبعا لو بتشرب سجاير زود على المصاريف كمان من 100 ل200 يورو سجاير شهرية
*****************************************
ملاحظات هااااااااامة
- نحب نعرف حضراتكم إن كل الشهادات المصرية ملهاش قيمة هنا على أرض إيطاليا يعنى لا فى شغل محاسب ولا مهندس ولا تشتغل فى بنك إلا لو قررت تعمل معادلة هنا وتدرس
- مش معنى إن معاك صنعة من مصر إنك لازم تكون هتشتغل بيها هنا فى إيطاليا لأن هنا اللى بييجى
قدامه أى شغل بيشتغله - شغلك فى إيطاليا غالبا هيتحدد بالناس اللى هتروح عليهم يعنى لو شغالين فى المعمار يبقى لو شافولك شغل اكيد هيكون معمار وهكذا
- اعمل حسابك إنك لو ملكش حد هنا فانت محتاج على الاقل من 1500 ل 2000 يورو مصاريف ده لو لقيت شغل على طول
أخيراً
البطالة فى إيطاليا وصلت لأكتر من 13% وفى آلاف من المصريين سابوا البلد وراحو بلاد تانية أو رجعوا لمصر وقبل ما تقرر خطوة السفر متبصش وتقارن نفسك بواحد بقاله سنين مظبط شغله وله اصحاب مصريين وطلاينه يخدموه بص للى لسه جاى من مصر زيه زيك وحاليا حتى الناس القديمه فى البلد آلاف منهم من غير شغل وربنا يفرجها قريب وطبعا الرزق بتاع ربنا فى الاول زفى الاخر بس احنا بنحكى الوضع الموجود .
ولو خلاص قررت تسافر يبقى تابع من هنا جميع طرق السفر لإيطاليا
السلام عليكم
حضرتك كاتب في الملاحظات لا في محاسب او مهندس او شغل بنوك الا لو قررت تعمل معادلة ممكن توضيح اكتر ؟