أخبار عاجلة
الرئيسية / أخر الاخبار / قصة حقيقة لمهاجر مصرى وصل لإيطاليا عبر قوارب الموت
قصة جقيقية لنجاة مهاجر مصرى من رحلات الموت

قصة حقيقة لمهاجر مصرى وصل لإيطاليا عبر قوارب الموت

إنهارده هحكى لكم عن تجربة من نوع  نادر إنك تقرأ عنها .
أنا سافرت ايطاليا هجرة غير شرعية عن طريق إسكندرية .. التجربة بدأت بإن الوضع كل يوم فى مصر بيخنقنى كل يوم عن اللى قبله واللى خلانى أبدأ أبحث عن طريقة أخرج بيها من البلد.
بعد ما إتعرفت على شخص قدر يوصلنى بمهرب فى البحيره “رشيد تحديدا ” هختصر لكم وهكلكم من اول ما ركبت المركب كان فى فجر يوم 5/7/2016 رغم ان وصلت رشيد وقعدت فيها ٢٢ يوم مابين رشيد وادكو وبرج العرب و العجمى و أماكن تانيه كتير عمرى ما سمعت عنها ف حياتى.

الهجرة غير الشرعية لإيطاليا

اكتر من ١٥٠ شخص نازلين نركب مركب زوديك صغيره بتتسع ١٠ افراد بتحولنا ع دفعات لمركب تانيه طولها ١٥ متر ع بعد حوالى ٥ كيلو عليها مشيت بينا حوالى كام يوم فى البحر لحد وصلنا لمركب تانيه حوالى ٢٤ متر بعد حدود ليبيا عليها اكثر من ٢١٠ شخص غير ١٥٠ يعنى اجمالى ٣٦٥ فرد ٢ سوريين و حوالى ٥٠ مصر و تقريبا ٥٠ سودانى والباقى افارقه من جنسيات مختلفه وطبعا مش عايزين احكى لكم عن تجربة نقل ١٥٠ شخص من مركب لمركب فى نص البحر وامواج بترفع مركب عن تانيه اكتر من ٦ متر وعند مايقربوا من بعد بيكون فى شخصين ع طرف المركب ورا ماسكينك بيحدفوك فى المركب التانيه زى ما بيحدفوا شنطة طماطم و اللى ينزل ع رجله تنكسر واللى ينزل ع كتفه يتخلع

المهم ربنا سترها الحمد لله ومفيش اى حد وقع فى الميه اتنقلنا كلنا فى المركب التانيه واللى كملت الرحله وهى عليها ٣٦٥ شخص بينهم حوالى ٧ اطفال رضع مركب عليها برميلين ميه البرميل ميكملش ١٠٠ لتر مع طقم سواقين مركب اشبه بالمافيا و ٣شوال عيش معفن متخزن من ٥ ايام ع كام كارتونة جبنه بتاكل مرتين فى اليوم مره الصبح بدرى اوى ومره اخر النهار وكذلك بتشرب ربع كوباية ميه مره الصبح ومره اخر النهار تحت تهديد السنج و السلاح واللى طبعا غير اتحكى لنا ان المركب هتبقى عليها ميه واكل وبالكتير ٦ ايام وهتوصل للصليب او السفن اللى هتيجى تاخدك بعد ما تطلب استغاثه وانا واحد من الناس سافرت بالهدوم اللى عليا مع مبلغ بسيط خالص باليورو وشوية اكل بسيط و شوية عصير جاف.

قوارب الموت

أصعب ما فى التجربة إن الميه خلصت بعد ١٣ او ١٤ يوم ومش فاضل غير حاجة بسيطة بتشرب تقريباً غطا إزازة و أخر ٣ ايام من غير ميه خالص والأكل بتخاف تاكله يعطشك أكتر مش هحكيلكم عن شكل الناس ومنظر شفايفهم اللى اسودت و قربت تعفن من جفاف بؤهم وماتكلمنيش عن مية البحر اللى تقريبا درجة ملوحتها اقرب بانك تدوب كيسين ملح فى ربع كوباية ميه واقسم بالله ما ببالغ لما بصور لكم درجة الملوحه انا واحد من ناس حطيت اكتى من كيلو عجوه فى قعر ازازة ميه فى سبيل إنها تخفف الملوحة عشان أقدر أشربها ولما حطتها ع لسانى رجعتها تانى بتحس إن لسانك بيتشوى وبتعطش أكتر و دا وصل الناس ع المركب إنهم يبيعوا السيجاره ع المركب ب٥٠ يورو وشويه سكر حجم ٤ معالق ب ١٠٠ يورو.

٣٦٥ شخص مات منهم ٥ بعد واكتر من ٣ جالهم صرع وناس دخلت فى غيبوبه ده كله بعد ما الماتور اتطل بعد ١١ يوم فى وسط بحر الحر فيه بالنهار زى ماتكون جوه بركان وليله اشبه بقطب شمالى مع هدوم مبلوله ومتغرقه ميه من الموج اللى بيضرب المركب من كل ناحية.

صورة من وصول مراكب الهجرة لمسينا

كلمنا الاستغاثه من تليفون ثريا بعد يوم من تعطل المركب فى مكان مجهول!
gps المركب بيقرأ اصلا احداثيات غلط ده قبل ما الشبيحة طقم المركب يرمى التليفون وال gps فى الميه بعد المكالمه واللى بعدها انتظرنا ٣ ايام ع ما وصلت لنا سفينة نرويجيه فى نص ليل اليوم الرابع واللى فضلنا عليها يومين لحد ما وصلنا ميناء messina فى جزيرة سيشليا.

كل اللى حكيته لكم دلوقتى بدون مبالغه —– 5 % —- من اجمالى التجربه وللاسف وثقت اغلبها بموبايل باكتر من ٣٥ فيلم قصير واكتر من ١٠٠ صوره واللى خلى السلطات الايطالية تاخده منى 
انهارده بكلمكم بعد ما قدمت ع اللجوء السياسى و أخدت الإقامة وفاضل لى خطوة أخيره وهى الكوميسيون و أحصل على حق اللجوء السياسى.

شاهد أيضاً

بالفيديو ضبط مصرى أثناء محاولته الغش بإختبار الرخصة الإيطالية

باءت محاولة شاب مصرى فى العشرين من عمره فى إجتياز اختبار القيادة بالفشل وذلك بعدما ...

سافيانو

ساڤينو :لست خائفاً من المافيا ولا من سالفينى!

“لست خائفا من ماتيو سالفيني”: قالها المؤلف الإيطالي روبرتو سافيانو فى تحدى وذلك بعد التهديد ...

غرامة 7 آلاف يورو فى إيطاليا

تعرف على غرامة السبعة آلاف يورو التى فرضها سالفينى !

فى ظل سعى رئيس الوزراء الإيطالى الجديد ماتيو سالفينى لتأمين حياة الإيطاليين والمساهمة فى الحفاظ ...

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: جميع الحقوق محفوظة لموقع مغتربى مصر فى إيطاليا