2
أخر الاخبارمواضيع هامة

سر الدراجات الصفراء والبرتقالية المنتشرة فى ميلانو وكيف تستخدمهم ؟

بقلم أ. ابراهيم حجي Ibrahim Heggi

في إطار تسهيل الحكومة الايطالية لقطاع النقل والمواصلات في المدن الكبيرة ظهرت من ايام درّاجات لونها اصفر وبرتقالي سهلة الاستخدام و تكاد تقترب من ان تكون مجانية .. ايه حكايتها ؟
شركتين من الصين واحده اسمها OFO ودي دراجاتها لونها اصفر والتانية اسمها MOBIKE لونها برتقالي
 آلاف من الدراجات والعدد قابل للزيادة اللي تقدر تستخدمها من اي مكان لاي مكان داخل المدينة بدون ما تتقيد انك تركنها في موقف خاص ، زي دراجات ATM مثلاً.. المهم انها تكون في مكان ظاهر يتيح لغيرك استخدامها.

ازاي اقدر أستخدمها ؟
كل اللي عليك انك تحمل التطبيق على تليفونك المحمول اضغط هنا ل mobike
(او اضغط هنا) ل OFO
وتسجل حساب جديد وتفتح خريطة البرنامج وهنا تظهر مواقع الدراجات المتاحة من حولك ، هتلاقي باركود خلف كرسي الدراجة “صورة الباركود” بتقرب التليفون منها او بمعنى ادق كاميرا تليفونك اللي هي بدورها هتعمل مسح ضوئي وتفتح لك الدراجة وتبقى جاهزة للاستخدام وتليفونك هيبدأ الحساب من الوقت ده ..
متنساش تقفلها بعد ما توصل بالسلامة (القفل موجود تحت الكرسي على العجلة الخلفية) وتقدر تتأكد من تليفونك انها قفلت.

طريقة الحساب والدفع :
النص ساعة في درجات Mobike بـ 30 شينتيزم (سنت) بتتخصم من الواحد يورو اللي بتاخده الشركة مقدماً من كارت البنك اللي بتسجل بيه..تقدر تسجل بـ ديبيت كارد “carta di debito”
اما شركة Ofo بمجرد ما بتسجل بتعطيك 100 بونت هدية مايعادل 2 يورو ، لو ركبتها 25 دقيقة بيطلعلك الحساب صفر بمعنى انه بيسحب الفلوس فقط لما تعدي النص ساعه..
ولكن بعد كده الدفع بيكون بـ كريديت كارد “carta di credito” والشركة اعلنت انها هتطور ده وتدعم قريباً طرق اسهل ومختلفة لنظام الدفع زي الكوبونات والعروض والاشتراكات السنوية..

مفيش شك ان الفكرة ممتازة وهتساعد ناس كتير خصوصاً في اوقات “إضراب المواصلات” او الزحمة او بعد انتهاء ساعات العمل في المواصلات العامة، او المناطق القريبة منك واللي احيانا بتركب لها اكتر من وسيلة نقل.. جدير بالذكر ان بلدية ميلانو اعلنت ان الخطوة دي هتقلل من ضغط استخدام السيارات بنسبة 30 ‎%‎ لسكان المدينة ونسبة 58‎%‎ للقادمين يومياً من خارجها ما يجعل ميلانو اقل ازدحاماً والهواء أكثر نظافة..

معلومات إضافية:
الدراجة بيها مميزات زي انها تملك اطار ” عجلة” ضد الثقب وفيها عاكس ضوء علشان القيادة ليلاً والكرسي مريح وتقدر تتحكم فيه بما يناسب طولك ، والتطبيق بيحسبلك الوقت والكيلومترات بدقة عالية وتقدر تعرف كمان عدد السعرات الحرارية اللي جسمك بيفقدها في كل رحلة.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: جميع الحقوق محفوظة لموقع مغتربى مصر فى إيطاليا

أنت تستخدم إضافة Adblock

برجاء دعمنا عن طريق تعطيل إضافة Adblock