شهادة التحركات لطالبى فيزة إيطاليا “الشنغن” عن تجربة شخصية

إيه هى شهادة التحركات:
ودي ورقة بتقول انتا كنت فين في آخر 7 سنين ، ودي من ضمن الورق المطلوب عشان فيزة إيطاليا السياحية (أول مرة)، يعني السفارة هيا اللي بتطلبها.
هام جدا: لو السفارة مطلبتهاش متعملهاش.

الخطوات:

• بتطلع من مجمع التحرير، مواعيده من السبت للخميس من الساعة ٨:١٥ … نصيحة متروحش بدري عن كدا عشان هتلبس في طابور وحش يعني تبقى هناك ٩ مثلا.
  
• الورق المطلوب: صورة بطاقة شخصية سارية، صورة أول صفحة في الباسبور (في مكان تصوير في الدور الأرضي جوا المجمع بس زحمة).. والصفحات اللي فيها فيزا تانية لو عندك يعني .
•  تطلع الدور التاني، الباب اللي على الشمال .. هتلاقي امين كدا معاه استمارة مجانية كدا ( في الصور ) ، أملاها .. وتروح على شباك رقم ٦ دا بتاع السفارات( في شباك ٣ دا بتاع التجنيد ملناش دعوه بيه )، خد معاك قلم عشان تنجز .
• بالنسبة للاستمارة واللي هيا عبارة عن طلب بتقدمه لازم تذكر السفارة اللي هتقدمه ليها ، وتكتب المدة اخر ٧ سنين من ٢٠١٠ ل ٢٠١٧ (دا الdefaultاللي السفارات عاوزاه ) لو عاوز اكتر عادي، بتكتب مثلا من ٢٠٠٨ ل ٢٠١٧ وبتدفع فلوس اكتر.
• بتسلم صورة البطاقة والاستمارة وصورة الباسبور على الشباك وتاخد ورقة تدفع بيها في الخزنة في نفس الدور (١٣ جنيه).
• بتاخد الوصل من الخزنة وترجع شباك ٥ تسلمه مع باقي الوصل وتاخد ورقة تستلم بيها بعد ٣ ايام عمل رسمي والموظفة كتبتلي المستندات المطلوبة عشان استلم الشهادة (في الصور).

الموضوع كله على بعضه خد ٤٥ دقيقة، بالتوفيق للجميع