الدراسة الجامعية والمنح في إيطاليا عن تجارب شخصية

تقرير: د/محمد كامل

مبدأيا كده المقال ده فيه مجموعة خبرات لأشخاص درسوا بالفعل وفيه معلومات ممكن تفيد أي شخص ناوي او بدأ دراسة.

الدراسة الجامعية في إيطاليا عبارة عن 3 سنين في الغالب دول الي هما بكالوريوس عندنا في مصر واسمهم هنا laurea triennale وبعديهم بيكون فيه سنتين دول ماجستير واسمهم هنا laurea magistrale وده بتعادل الماجستير عندنا في مصر ، وبالتالي بيكون عندهم مجموع الدراسة 5 سنين، واذا حصلت عليهم بيكون من حقك التقديم على دراسة الدكتوراة الي بيسموها بالإيطالي dottorato di ricerca. وبالتالي فيه طلاب بعض الدول العربية او دول أخرى عندهم عدد سنوات الدراسة 5 وبالتالي بيكون معادله لعدد الساعات المعتمدة في ايطاليا ومن حقهم يقدموا على دكتوراة بشكل مباشر من غير الحصول على شهاده الماجستير لأنهم بيعتبروا عملوا الساعات المعتمدة والسنين الدراسية المؤهلة. طبعا الكلام ده لا ينطبق على مصر إلا في بعض الحالات يعني فيه طلبة بيدرسوا الأربع سنين وبعدين بياخدوا سنة دبلومة متخصصة وبيعادلوها بالخمس سنين وبيقدموا على دكتوراة على طول وفيه طلبة من هندسة بيدرسوا خمس سنين وبيقدموا دكتوراة علطول الحالات ده ممكن تقابلك بس مش كثيرة وعندهم مشكلة إن الشهاده بتاعة الدكتوراة لو حصل عليها لا يتم معادلتها في مصر بشكل رسمي من قبل المجلس الأعلى للجامعات لأن من متطلبات الدكتوراة في مصر هي الحصول على شهادة الماجستير. ولكن يمكن الاستفاده بها لو هاتشتغل في القطاع الخاص بدون الحاجه إلى المعادلة.

بعد الدكتوراة فيه ناس بتدور على بوست دكتور وده غالبا بتنزل في ايطاليا تحت مسمى assegni di ricerca.

فأي حد بيفكر يدرس هنا لازم أولا يعمل معادلة للشهادات بتاعته.

معادلة الشهادة الدراسية: “Dichiarazione di Valore in loco”

 تعبئة الطلب الخاص بالمعادلة اضغط هنا.

• صورة من بطاقة الهوية أو الباسبور ويكون ساري الصلاحية.
• توثيق الشهاده الدراسية فتختم بختم أمين الجامعه ثم يصدق عليها وتختم من وزارة الخارجية المصرية.
• ترجمة الشهادات المراد معادلتها عند مكتب ترجمة معتمد.
• تقدم لمكتب القنصلية الإيطالية بمصر للتوثيق.
• يتم احضار صور من كافة شهادات المراحل الدراسية السابقة للمؤهل الحاصل عليه.
• تقدم لمكتب القنصلية الإيطالية بمصر بغرض الحصول على شهادة معادلة.

Per ottenere una dichiarazione di valore sono necessari:

Modulo di Domanda, debitamente compilato e sottoscritto (cliccare qui));

Fotocopia di passaporto o carta di identità in corso di validità; 

Diploma o certificato in originale o debitamente reso ufficiale,  1) vidimato dall’Ufficio vidimazioni e legalizzazioni del locale Ministero degli Affari Esteri,  Kornesh El Nil –Ramsis, 2) tradotto in italiano, 3) legalizzato dall’Ufficio Legalizzazioni della Cancelleria consolare

Fotocopia del diploma o o del certificato di cui si chiede la Dichiarazione di Valore e della sua traduzione.

طبعا علشان تعمل الخطوة ده لازم بتدفع فلوس علشان الترجمة والتوثيق وغيره ولازم تحجز ميعاد من القنصلية (ولكن ممكن عن طريق المركز الثقافي الإيطالي بالقاهرة الكائن في 3 شارع الشيخ المرصفي بالزمالك القاهرة. يمكن أن تقدم لهم طلب انك بتبحث عن استكمال الدراسة في إيطاليا وتحتاج لتوثيق الشهادات الدراسية ، وبتاخد جواب موجه منهم للقنصلية الايطالية فبتدخل كاستثناء بدون حجز موعد وبيتم عمل توثيق للشهادات الدراسية بدون رسوم يعني من غير ما تدفع) ركز أنا كاتب ممكن يعني ممكن يتم كده وممكن يرفضوا.

بعد المعادلة بيكون علينا التقديم في الجامعة وهانبدأ بدراسة الماجستير:

دراسة الماجستير في إيطاليا:

مبدأيا لازم حضرتك تعرف تخصصك ايه بالضبط وبيتبع كليات ايه في ايطاليا واسمه ايه بالإيطالي وده ممكن تسأل فيها المركز الثقافي أو عن طريق بعض المواقع الإلكترونية مثل http://www.mastersportal.eu/ أو من الزملاء الدارسين من خلال الجروبات الموجوده على الفيس بوك زي:

اتحاد الطلاب والباحثين المصريين في إيطاليا 

Egyptian students in Italy

االمبعوثون المصريون في ايطاليا

 بعد كدة الحصول على admission أو قبول من الكلية أو القسم وده عن طريق ان حضرتك بتدور في مجال تخصصك في الجامعات المختلفة وبتشوف برنامج دراسة الماجستير بيبقى ليه مواعيد محددة للتقديم سواء للترم الأول أو الثاني وبتشوف المتطلبات وطريقة التقديم وبتقدم.

طبعا موضوع اللغة مهم جدا جدا لأن في الأغلب الدراسة بتكون باللغة الإيطالية في الماجستير ولكن بيكون فيه بعض التخصصات أو بعض الجامعات بتتيح برامج دراسية باللغة الإنجليزية فلازم تركز إنت بتقدم على ايه لأن لو البرنامج باللغة الإيطالية يبقى ممكن يتطلب منك شهادة إجادة اللغة الإيطالية فوق مستوى A2 . طبعا بالإضافة إلى الشهادات الي تمت معادلتها ممكن يطلبوا بيان درجات البكالوريوس بالإنجليزي ، سيرة ذاتية على النظام الأوروبي بالإنجليزية ، ودائما بيتطلب تكتب خطاب انت ليه بتقدم على الدراسة ده motivation letter وممكن مشروع بحثي بسيط proposal.

بعد الحصول على ال admission بتعمل تسجيل في الجامعة enrollment وبتاخد جواب القبول وتبدأ تقدم على الفيزا بغرض الدراسة وده متطلباتها كالتالي:

• نموذج طلب الحصول على تأشيرة ( اعرض )
• صورة حديثة بحجم صور جوازات السفر
• وثيقة سفر صالحة ثلاثة أشهر على الاقل من تاريخ التأشيرة المطلوبة وتضيف عليهم شهادة تحركات بتطلع من مجمع التحرير وبتاخد حوالي شهر او أكثر.
• ما يدل على توافر في إيطاليا الى سكن – حجز فندق – اعلان للضيافة وتذاكر طيران مبدأية.
• ما يدل على توافر سبل العيش بالنسبة للإقامة في إيطاليا، بمبلغ لا يقل عن القيمة المحددة في الجدول (أ) من التوجيه الصادر من وزارة الداخلية بتاريخ 1 مارس 2000 ( اعرض ) يعني (bank statement) بتوضح ان لديك رصيد في البنك في حساب جاري أخر ستة أشهر تقريبا ما يوازي او اكثر من 3 ألاف يورو.
• التأمين الصحى إذا كان لا يحق للأجنبى العلاج في إيطاليا بحكم الاتفاقيات المعمول بها فيى بلده
• التسجيل او التسجيل المسبق للدورة الدراسية التى ستتابع في إيطاليا.
• بعض المواقع الخاصة بطلب التأشيرة

http://vistoperitalia.esteri.it/home/ar#BMQuestionario

http://www.vfsglobal.com/italy/egypt/

http://www.mastersportal.eu/articles/1654/how-to-get-a-student-visa-for-italy.html

أخيرا المنح الدراسية :

غالبا الماجستير في ايطاليا بتكون من غير منح دراسية وبتطلب إنك تسجل على حسابك الشخصي وبيكون التكلفة اول قسط 900 يورو وبعد كده القسط الثاني والسنة الثانية بيكون على حسب معدل الدخل السنوي للأسرة الي هيا بتتعرف من شهادة modello-isee-universita  وده له طريقة في التقديم عليه.

ولكن فيه في إيطاليا بعض الجهات الي بتدي منح للماجستير من أهمها وأشهرها بالذات عند طلاب الهندسة هي Diritto allo Studio Universitario (DSU)

وده جهة موجوده في أغلب الأقاليم في إيطاليا وكل محافظة أو إقليم بتشوف الجامعه الي انت بتقدم فيها تابعة لأي مكتب وبتبدأ تشوف نظام ومواعيد التقديم في المحافظة الي انت تابع ليها وهاتلاقي دائما على موقع الجامعه صفحة خاصة بالمنحة ده مثلا ميلانو اضغط هنا. 

طبعا لو انت بتقدم على المنحة ده يفضل إنك تكون داخل دراسة ترم أول لأن التقييم بيكون ساعتها على الحالة الاقتصادية بس او معدل الدخل وبالتالي سهل تحصل عليها أما بقه لو بتقدم عليه ترم ثاني او في السنة الثانية فبيطلب منك عدد المواد والكريدت الي حصلت عليها وتقديرك فيهم ولازم تكون وصلت لعدد معين من الوحدات وبتقدير معين وده صعب طبعا في بداية الدراسة وبالتالي بيكون صعب الحصول عليها.

لو حضرتك بقه موجود في إيطاليا أو عايش هنا أصلا وبتقدم فهتجيب ليهم modello-isee ، أما بقة لو حضرتك هاتكون لسه جاي من مصر فلازم بتعمل بحث اجتماعي قبل ما تيجي عن طريق مكتب التضامن الإجتماعي في محل سكنك وبتاخد منهم الورقة وفيها مستوى الدخل ومكان السكن وعدد افراد الأسرة وتختمها من مديرية التضامن في المحافظة ويتوثق زي باقي الورق من الخارجية ويترجم ترجمة معتمدة ويدخل يتوثق من القنصلية الإيطالية وبتدفع عليه طبعا. وبتقدمة بقه لورق المنحة.

المنحة بقه بتغطي مصاريف الجامعة وبيكون ليك أكل وسكن والسكن على فكرة بيكون تبع الجامعه وممكن يتأخر تسليمه لحد شهرين من بدء الدراسة فبتكون مظبط سكن بره وممكن كمان المنحة تدفع مبلغ مالي بسيط زي بوكت كده على فترات.

 لازم ناخد بالنا من بعض النقاط المهمة:

• مش معنى إن اتكتب هنا ان الخطوات لازم تكون مثلا معادله وبعدين تقديم وجه واحد حصل انه قدم وبعدين عمل المعادله يبقى الكلام غلط لا ، انا في المقال ده هاكتب أصح الطرق والي ممكن يكون فيه استثناء من مكان لآخر.
• ممكن اثنين بيقدموا ومعاهم نفس الأوراق ونفس الإجراءات بس موظف يوافق على حاجات مع واحد ويرفض مع التاني ده بيحصل عادي.
• محدش يحاول يعمل غلط ويدافع عنه ويخلق مشكله أكبر لأن بيضيع فرص على ناس تانية كثير زي الناس الي بتزور شهادات لغة وغيرها لما بتتكشف بيحصل مشكلة وبيضيقوا على الكل.

إنتظروا المقالات القادمة عن دراسة الدكتوراة والبوست دكتور،

ونسأل الله لنا ولكم التوفيق والسداد ، ولا تنسونا من دعائكم.