قصة العقود الموسمية السنة دى 2019
بعد ما وزير الداخلية الايطالي ماتيو سالفيني وقع يوم الخميس 21 فبراير على قبول
2019 decreto flussi أو زى ماهو معروف لأغلبنا كعرب بإسم العقود الموسمية وهو عبارة عن استقدام عمال أجانب للعمل بإيطاليا وفق شروط معينة وتم نشره القانون يوم 12 مارس في الجريدة الرسمية ندخل بقى على أهم تفاصيله وخاصة إن التقديم هيتم بكره الأربع 24 إبريل وهو دا اللي حمسنا نكتب الموضوع دا .
أولا نعرف إيه هو قانون العقود الموسمية 2019 بشكل بسيط للي مش متابع وللي مش فاهم :
قانون العقود الموسمية دا قانون بينزل بشكل سنوى لجلب عمالة أجنبية من خارج إيطاليا بس بشروط معينة وبعدد عمالة معين ولدول معينة بينها وبين إيطاليا إتفاقيات والدول دى زي الشمال العربي مصر والمغرب والجزائر والمغرب وكام دولة إفريقية وكام دولة لاتينية وشبه أوروبية أحوالها الإقتصادية ضعيفة.
ميعاد التقديم علي العقود الموسمية 2019
هيبدأ التقديم إن شاء االله يوم 24 ابريل يعنى بكره ودا للناس اللي هتقدم علي العقود الموسمية وهيبدأ التقديم تحديداً الساعة تسعة الصبح بالدقيقة .
في جزأ للتقديم تاني خاص بالناس اللي كانت معاها أصلاً إقامات لأسباب مختلفة وعاوزة تحولها لإقامات أنواع تانية وعلي سبيل المثال لا الحصر الطلبة اللى عاوزين يحولوا من دراسة لعمل وأصحاب العقود موسمية السابقة اللي عاوزين يحولوا لعمل وأصحاب الإقامات فى دول أوربية أخرى وعاوزين يحولوها إيطالية وخلافه من الأنواع المختلفة للإقامة ودا بدأ بالفعل التقديم عليه يوم 16 إبريل
تاريخ انتهاء التقديم وكالمعتاد هيكون 31 ديسمبر 2019
.
الأعداد المقدرة لقانون العقود الموسمية 2019
المرة دى إيطاليا طالبة زى عدد السنة اللى فاتت وهو
30850 عامل وعاملة والعدد مقسم لقسمين زى الشرح الجاى دا يا معلم :
أول قسم ودا اللي بيهم معظم الناس عدد 18000 عامل وعاملة لراغبى الحصول علي العقود الموسمية والعدد دا اللي بيجي يمارس الأعمال الموسمية اللي هنذكرها في الفقرة القادمة أما القسم التانى فمطلوب 12850 عامل ودا بيخص فقط الناس اللي عاوزة تحول إقاماتها و أصحاب العقود غير الموسمية زى الأطباء المهندسين ودكاترة الجامعة وخلافه مهن ذات عقود مفتوحه وحرة .
بالتفصيل العمل والمعيشة فى إيطاليا
إيه هى القطاعات المطلوبة في عقود العمل الموسمية 2019 ؟
العامل الموسمى يقدر يشتغل في قطاعات الفنادق والسياحة والزراعة ولا يسمح له بشغل أى أعمال أخرى وإحنا شخصيا بننصح إن اللي جاي بعقد موسمي يحاول يشتغل في مكان العقد خاصة إنه لو شغال نيرو في مكان تاني واتمسك لا قدر الله بتبقي مشكلة !
وبعد كدا يقدر يجدد عقده في مكان اخر خاصة لو عقده الموسمي أكتر من 3 شهور ودى هنشرحها في فقرة جاية .
ملحوظة فيه في عقود العمل الموسمي شغل
Colf e badante, lavoro subordinato بس مش لينا كعرب وهما 100 فرصة فقط .
عشان برده منبقاش بنهدر حق الناس اللي عاوزة تحول إقاماتها وأصحاب العمل الحر اللي القانون الموسمي أتاحلهم 12850 فرصة والمنقسمة بين تحویل تصريح الاقامة و والعمل الحر واللي قولنا إن معادها بدأ يوم 16 ابريل هنشرحها عالماشى كدا
ال 12850 متقسمين كالتالي
*تحويل تصریح العمل الموسمي إلى تصریح عمل ثانوي 4750 فرصة «Permesso di soggiorno da lavoro stagionale a lavoro subordinato»
*تحويل تصريح الدراسة والتدریب المھني إلى تصريح عمل ثانوي 3500 فرصة « Permesso di soggiorno da motivo di studio a lavoro subordinato»
*تحويل تصريح الدراسة والتدریب المھني إلى تصريح العمل الحر 700 فرصة « Permesso di soggiorno da motivo di studio a lavoro autonomo»
*تحويل تصريح الاقامة طويل الاجل صادر من المفوضیة الأوروبیة أو دولة أخرى في الاتحاد الأوروبي مخصصة لهم 100 فرصة للتحويل للعمل الحر «Permesso di soggiorno dagli Stati membri dell’UE a lavoro autonomo»
التقديم علي العقود الموسمية بإيطاليا 2019
يتم التقديم علي العقود الموسمية من خلال موقع وزارة الداخلية الإيطالية علي الرابط التالي
https://nullaostalavoro.dlci.interno.it/Ministero/Index2
طبعا بداية من 19 مارس 2019 بدأ العمل بنظام اسبيد او الهوية الإلكترونية الواحدة للدخول ع كل المصالح الحكومية في إيطاليا والتقديم ع العقود الموسمية للإشتراك من خلال الرابط التالي
https://www.spid.gov.it/?fbclid=IwAR34jsytjRj-I4Gk-hmaDJkiCLi3SXq8RUgMTPKJjrBB3BlJu7qQy4Y8OLs
وتوفيراً للوقت الناس اللي مش هتقدر تتعامل في المواقع دى تقدر تلجأ لأي مكتب كاف أو حد صاحب خبرة للتقديم .
أسئلة حائرة فى العقود الموسمية بإيطاليا !!
طبعاً أول سؤال بيخطر علي بال اخواتنا اللي نفسهم يجوا وينوروا إيطاليا .. هل ينفع أقدم لنفسى والإجابة للأسف لا متقدرش تقدم لنفسك ولازم تشوف حد صاحب عمل يقدمك من إيطاليا ودا بتقدر توصله عن طريق معارفك هنا .
هل لو حصلت علي عقد عمل موسمي هقدر أجدده وأطلع علي روما زى عنتر شايل سيفه 🙂
الإجابة طبعا يا معلم بس بكام شرط كدا هتقدر تحول تصريح إقامتك من إقامة موسمية لإقامة عادية أو ع الأقل ومبدأيا بسنة
– أول حاجة لازم عقدك الموسمي يكون بأكتر من 3 شهور اتأكد من كدا ضرورى والا بلاش تعمل عقد أحسن عشان أبو 3 شهور مبيتجددش !
ــ تاني حاجة أما تيجي بعقد أكتر من 3 شهور هنا لازم تلاقي حد تجدد عليه عقدك بشرط إنك تكون منتظم في شغل اللي إنت جيت عليه ودافع ضرايبك علي الأقل 3 شهور واتكي علي دافع ضرايبك دى !
في الحالة دى هتقدر تجدد عقدك وتنضم للفئة التانية اللي بدأ التقديم ليها 16 إبريل اللي فات وانت مستريح ان شاء الله 🙂
ملحوظة هامة :
العامل اللي جه قبل كدا إيطاليا بعقد عمل بعقد موسمي في أخر 5 سنين والتزم بيه ورجع بلده وقدم تاني يقدر ياخد اقامة بثلاثة سنوات طبقا للنص و المرسوم التشريعي للھجرة 25 يولیو 1998 م. مادة 286 والتي تنص على إمكانیة طلب تصریح إقامة لمدة ثلاث سنوات .
الموضوع دا متاح فقط للعمال اللي دخلوا إیطالیا بالفعل للعمل الموسمي مرة واحدة على الأقل في السنوات الخمس السابقة.
تكاليف العقود الموسمية بإيطاليا
نيجي بقي للفقرة اللي بتهم أغلب الناس اللي عاوزة تقدم علي عقد موسمي وهي التكاليف وهنقسمها لقسمين
أولهم صاحب الشغل اللي عملك العقد بنفسه بدون اللجوء لمكتب يعمل العقد وقتها هيتكلف فقط 16 يورو وهي قيمة الدمغة الموضوعه ع الأوراق!
ثانيهم صاحب شغل عملك عقد ولكنه لجأ لمكتب أو محامي عشان التقديم وقتها ممكن يتكلف من 200 ل 400 يورو تكاليف وأتعاب المكتب بخلاف الدمغة السابق ذكرها .
بعد وصولك بالسلامة هنا بتبدأ تشتغل ويتم استقطاع جزأ من مرتبك كضريبة للدولة كباقي حال العاملين في الدولة .
وأخيراً بننبه ع الجميع عقدك دايما بأكتر من 3 شهور عشان التجديد ومتديش فلوس لحد قبل ما تستلم العقد في إيدك وعشان تعرف إزاي ميتنصبش عليك تابع الموضوع دا فيه كل التفاصيل ولمتابعة الموضوع اضغط هنا
سؤال … في حد عنده شركة ملتزمة بالضرائب وورقها سليم لكنها شركة معمار … ينفع يقدم لحد في مصر ولا الطلب هيترفض لانها شركة ليست في مجال السياحة او الزراعة
متي يتم اعلان نتيجه المقبولين في الدعوات الموسميه
انا اتمنى العقد عمل الموسيمىانا العريف ال سعيد من المغرب