جميع طرق السفر لإيطاليا

على صفحتنا على الفيسبوك كل يوم بيجيلنا ما لا يقل عن 20 سؤال مضمونهم إزاى أسافر إيطاليا وإيه هى الطرق الممكنة القانونية والغير قانونية للسفر والتكلفة وعشان كدا فى الموضوع دا هنوضح جميع طرق السفر لإيطاليا

• جميع طرق السفر لإيطاليا

  “إزاى أسافر إيطاليا”

         هناك 6 طرق للسفر لإيطاليا 

• الطريقة الأولى

• الهجرة غير الشرعية لإيطاليا

  عن طريق مراكب الموت و نسبة المخاطرة فيها كبيرة جدا وناس كتير بتموت وهى أصلا شغل مافيا يعنى كلها قرف
  أسعارها حسب ما سمعنا من ٨٠ ألف ل١٥٠ الف جنيه
  لو وصلت بالسلامة فى إمكانية إنهم يرحلوك على طول وفى إمكانية إنهم يدخلوك فى حجز او كامب تبع الصليب الأحمر وهيكون مطالب منك تاخد قرار اما إنك تهرب وتدخل البلد او انك تفضل فى الكامب على امل تاخد اوراق 
  واحنا شخصيا كإدارة الموقع لا ننصح إطلاقا بخوض هذه المغامرة لخطورتها على الحياة .

• الطريقة التانية 

فيزا السياحة لإيطاليا

عن طريق فيزا سياحية من القنصلية الإيطالية فى مصر و هى أرخص الطرق لكن من الصعب الحصول على فيزا ومطلوب منك ضمانات كتير ومتعددة كحساب بنكى وعمل ثابت للتأكد إنك هترجع مصر وفى حالة كسر الفيزا سيكون وضعك سئ فى البلد للأسف الشديد
وللتفاصيل الكاملة تابع موضوعنا المشروح عن الفيزا السياحية لإيطاليا بالتفصيل الممل

https://moghtarben.com/فيزا-السياحة-لإيطاليا-فى-سؤال-و-جواب/

خطورة وجودك فى إيطاليا بشكل غير شرعى

الطريقتين الأولى والثانية حضرتك لو دخلت ايطاليا هتكون من غير إقامة ومشاكل المعيشة من غير إقامة كتير أهمها
*قوانين العمل فى إيطاليا بتمنع عمل الشخص الذى لا يمتلك إقامة وبتفرض غرامة على الشخص اللى يشغل واحد من غير إقامة من 10 ل50 ألف يورو وسجن من شهر لسنة
فعلشان كده لو إنت معندكش صنعة مطلوبة وحد يغامر ويشغلك هتكون صعب جداً خصوصا الأيام دى إنك تلاقى شغل وطبعا الأرزاق بيد الله .
*سهل جدا أى حد ياكل عليك حقك وملكش تطالب بيه. 
*لو حصلك حاجة فى الشغل مش هتاخد أى تعويض عن أى ضرر يحصلك

*فى إمكانيه لكنها بسيطه إنك تتمسك وتترحل لأن كل سنة بينزل ميزانية ترحيل وفى وقت الميزانية دى اللى بيمسكوه بيرحلوه مش كتير لكن بتحصل
*لو أى ظابط وقفك وعمل عليك كنترول ولقاك من غير ورق هياخدك يبيتك ليله فى القسم ويفيشك
وإنت و حظك يا تخرج يا تترحل .
———————————————————————————–

• الطريقة الثالتة

• العقودات الموسمية فى إيطاليا

  وهى من أكتر الطرق أمان لكنها الأكثر تكلفة وبتاخد وقت كبير وهى عن طريق قوانين الدعاوى أو الخدم

كل الطرق دى بتستنى لحد ما يفتح قانون فى إيطاليا وده ملوش مواعيد محددة ولكنه بيفتح سنوياً و عامة لو فى قانون فاتح بتكون مظبط مع أى واحد مقيم فى إيطاليا وعنده شركة أو بالمصرى سجل تُجارى(واحد بيشيل شغل معمار-عنده محل بيتزا-محل خضار-مطعم …..)
صاحب الشركه فقط هو اللى من حقه يقدملك فى القانون لو فتح وبيتفق معاك على فلوس والفلوس دى بيكون فيها مقدم حوالى من ١٠ ل ١٥ آلاف جنيه مصرى …المقدم ده سواء جالك الرد أو مجاش بيضيع عليك

….بعد التقديم بتستنى على ما يجيلك الرد …يوم ما يجيلك الرد بتدفع الفلوس كاملة للى عاملك العقد

أسعار عقود العمل فى ايطاليا

 
حسب اخر اسعار للقوانيين اللى فاتت كانت الاسعار من ٢٠٠ ل ٤٠٠ الف جنيه مصرى غير المقدم غير من ١٠ ل ١٥ آلاف جنيه مصرى غير الفلوس اللى بتخلص بيهم ورقك فى مصر  وتجيب بيهم التذكرة
وغالباً صاحب الشغل اللى بيجيبلك الورق يوم مايجيلك الرد ملوش دعوه بيك لا بيشوفلك شغل ولا سكن

لو جالك الرد فاكيد مافيش مشاكل وهتيجى إلا إذا كان عندك مشكله أمنية أو مع الجيش وفى الحالة دى هتضيع عليك الفلوس صاحب الشغل ملوش دعوة لكن لو معندكش مشاكل فأكيد مافيش مشاكل وهتيجى بأمر الله وتستلم اقامه ممكن تكون بتتجدد او مبتتجددش وتكسر فيزا ودا كله بيكون على حسب اتفاقك مع اللى بيجبلك العقد  .
ولو عاوز تعرف اكتر عن أسعار عقود العمل الحقيقية وتكلفتها راجع الموضوع دا 

https://moghtarben.com/التكلفة-الحقيقة-لعقود-العمل-الموسمية/

• الطريقة الرابعة والأكثر بساطة وقانونية

• الضم العائلى فى إيطاليا

  وهى طريقة الضم العائلى يعنى تقدر تسافر لو موجود قريب ليك من الدرجة الأولى فى إيطاليا زى مثلا والدك والدتك زوج يعمل لزوجته والعكس  إلخ ..
  يقوم الطرف الموجود ليك فى إيطاليا بطلب التقديم ع ضم عائلى وبعد اتمام الإجراءات تقوم بالسفر.
  ودا مثال للضم العائلى للزوجة بالتفصيل الممل تابع موضوعنا ع الرابط التالى

https://moghtarben.com/الضم-العائلى-للأسرة-فى-إيطاليا/
———————————————————————————–

• الطريقة الخامسة 
  

  فيزة الدراسة فى إيطاليا 

  وهى فيزة يتم طلبها لغرض الدراسة ولتفاصيل أكثر عن الموضوع دا
  إتفضلوا إقرءوا موضوعنا الكامل والمفصل عن الدراسة فى إيطاليا والحصول على الفيزة ومعادلة شهادتك بإيطاليا
  https://moghtarben.com/ملف-شامل-متكامل-عن-التعليم-و-الدراسة-فى/

———————————————————————————–

• الطريقة السادسة
  

  الفيزة العلاجية فى إيطاليا 

  ويتم طلبها فى حالة الرغبة فى العلاج بإيطاليا وللإطلاع على تفاصيل أكثر راجع موضوعنا عن الفيزة العلاجية وكيفية الحصول عليها على الرابط التالى
  https://moghtarben.com/الفيزة-العلاجيه/
  ———————————————————————————–
  أخيراً وبالنسبة للشباب  
  *متصدقش كل اللى يقولك تعالى وملكش دعوة ولا كل اللى يقولك أنا قدمتلك فى القانون لأن فى الغالب بيكون بس كلام  .. لازم تكون واثق مليون % من الشخص اللى بيقدملك على عقد
  أو بيساعدك فى إجراءات السفر.
  وبعد كل اللى قلناه ده ياريت اللى يلاقى أى فرصة سفر يسافر بس ياريت تكون طريقة قانونية علشان لو على الأقل ملقتش شغل تقدر تحاول فى مكان تانى فى بلد تانية أو تنزل شهرين تلاته مصر لحد ما الحال يبقى كويس
  —————————————————————————
  وللتعرف أكثر على العمل والمعيشة فى إيطاليا تابع موضوعنا التالى
  اضغط هنا