مبدأيا كلنا عارفين إن قانون فلوسى أو العقود الموسمية 2018 هو قانون لجلب العمالة من خارج إيطاليا ومش معمول للمهاجرين اللى مش معاهم ورق على أرض إيطاليا ولكن مع كثرة المهاجرين غير الشرعيين على الأراضى الإيطالية والموجودين بدون أوراق كنا لازم نشرح إزاى ممكن يستفيدوا من القانون دا .
لو إنت متفيش قبل كدا فى إيطاليا أو دول إتحاد أوروبى ما عدا اليونان متكملش قراءة المقال دا مش هيفيدك .
لو إنت واخد ورقة فيا “طرد” من إيطاليا متكملش قراءة المقال مش هيفيدك .
لو إنت عملت مشكلة وإتحبست أو أخدت حكم هنا متكملش المقال مش هيفيدك.
المقال دا للمهاجرين الغير شرعيين على أرض إيطاليا اللى صفحتهم بيضا ولم يتم إستواقافهم وتفيشهم ولم يحصلوا على أى ورقة فيا . لو كنت من المهاجرين الغير شرعيين فى إيطاليا إليك الفكرة المطروحة لتقنين وضعك كمهاجر ،الفكرة كلها بتدور حول إنك توفر لنفسك عقد فى القانون دا وتنزل تخلص إجرائته من مصر .
أولاً إنت محتاج شركة تعملك العقد ومش بتفرق جنسية صاحب الشركة ممكن يكون إيطالى أو مصرى ولكن يجب أن يكون وضع الشركة قانونى 100% يعنى إيه قانونى يعنى يكون بيدفع ضرايب ويكون فعلا شركة دخلها يؤهلها إنها تطلب عمالة من الخارج .
المهاجر دوره إنه يختار الشركة ويدى ورقه لصاحب الشركة دى والورق بيكون الباسبور بشكل مبدأى من قبل العامل
أما صاحب الشركة فبيعمل الطلب أونلاين على الموقع التالى وقت فتح باب التقديم
https://nullaostalavoro.dlci.interno.it
أو بيوكل محاسب الشركة أنه يعمل هو الطلب ويجهز الأوراق ويقدمها على الإنترنت
فى حالة قبول طلب صاحب الشركة بيتم التواصل معاه لإكمال باقى أوراق الشركة وإعطائه النولا أوستا أو شهادة عدم ممانعة الدولة فى إستقدام العامل ، فى الوقت دا لو إنت مهاجر غير شرعى بتكون جهزت نفسك إنك تاخد النولا أوستا من صاحب الشركة وتنزل بيها مصر ومتنساش تكون مختار عقد عمل متجدد مش موسمى .
طبعا هيكون الخروج من إيطاليا من خلال دولة تانية مش هنخرج من إيطاليا ولكن نحجز ونسافر من أى دولة مجاورة .
بعد وصولك مصر بالسلامة إن شاء الله هتستعمل خطاب العمل وتتصل بشركة VFS Global على الرقم التالى
0233323003
عشان تحجز ميعاد وتمشى فى إجراءات الحصول على الفيزة بعقد العمل وطبعا فى الميعاد المحدد بيقولوا لحضرتك على جميع الأوراق المطلوبة وبعد ما تخلص إجراءات ترجع إيطاليا تانى بالسلامة .
ملحوظة هامة :أثناء تخليص إجراءاتك فى مصر ممكن تحتاج أوراق تانية من الشركة وان المحاسب يرسلها من ايطاليا وخلافه فلو انت مختار شركة مش محل ثقة ممكن تتعرض للنصب ببساطة لانهم عارفين انك فى مصر وهترجع بصعوبة عشان كدا بنأكد للمرة للمليون إختاروا ناس محل ثقة وبالتوفيق .
يعني انا لما اسافر غير شرعي احاول ان لا اتمسك؟