أول سؤال بييجي في بال الناس .. اشمعني المانيا ؟ ليه مش انجلترا ولا السويد ولا امريكا ولا بولاق الدكرور ؟
ببساطه ومن غير تذويق للكلام .. عشان المانيا ارخص بلد ( نضيفة وقوية ) للي حالتهم شبه مستريحة في مصر تقدر تتعلم فيها واللي عن طريقها تقدر تكت وتهرب ومترجعش مصر تاني
————————————————————————
إزاي يعني أرخص بلد نضيفة ؟
رسوم الدراسة في ألمانيا مجانية ببلاااااااااااااااااااش في 80 % من الجامعات هناك باستثناء :
1- بعض الجامعات بتطلب مصاريف متوسط 300 يورو فى الترم
و الرسوم دي بتبقى شاملة حاجات كتير زي كارت المواصلات المجاني مثلا
.
2- ولايه بادن فورتمبيرغ الوحيدة من بدايه شهر 10 الجاي لسنه 2017 أى جامعة فى الولاية دي المصاريف فيها هتبقي ب 1500 يورو لأى طالب هيقدم عليها من برا الاتحاد الاوروبى
———————————————————————-
كل دة جميل بس برضو مقولتليش ازاي هكت ومش هرجع ؟ مهو بيقولولي تأشيرة الدراسة لأي مكان في العالم بتخليك تدرس فقط ولازم ترجع بعد انتهاء مدة التأشيرة !!
.
أولا مين قالك إن بعد إنتهاء أي دراسة لازم ترجع بلدك فورا دي ؟
في اكثر من بلد حول العالم بتدي تصريح بعد الدراسه بمدة معينه انك تدور علي شغل او تشتغل فوراً وتعمل إقامه عمل
البلاد دي منهم المانيا والنمسا وفرنسا وامريكا ونيوزيلاندا وكذا بلد تانيه
أمريكا مثلا بتديك تصريح عمل لمدة سنة بعد انتهاءك من درجة علمية من جامعة معتمدة
ألمانيا بقي يا برنس بعد الدراسة بتديك سنه ونص فيزا بحث عن عمل ولو لقيت شغل خلال الفترة دي بتاخد إقامة عمل
وإقامه العمل دي بتتحول لاقامة دائمة بعد 3 سنين وبعض التخصصات بتبقي بعد سنتين بس
.
يعني من الاخر المانيا كتعليم وكمستقبل بعد الدراسه أنضف من روسيا و اوكرانيا وماليزيا
وفي نفس الوقت ارخص كمصاريف من كندا و امريكا وانجلترا
.
لكن طبعا علي رأي المثل المصري اللي قادر علي الكحل يتكحل ..
معاك 20 ولا 40 الف دولار عشان تروح تدرس في انجلترا ولا امريكا ولا كندا ولا السويد
دووووووس يا وحش في البلاد دي وافكس لألمانيا خالص
———————————————————————
طيب يا سيدي عرفت ان رسوم الدراسه مجانا في الجامعات .. شروط الدراسه نفسها ايه بقي ؟؟
1- فتح حساب بنكى مغلق فى المانيا بمبلغ 8640 يورو أو وجود ضامن الماني يضمنك ويتحمل تكاليف معيشتك
الفلوس دي فلوسك مش فلوسهم يعني تسحب منهم شهريا زي ما انت عايز بس بشرط ما تزيدش عن 735 يورو سحب شهريا
يعني عايز تصرف منهم كل شهر 100 براحتك .. 200 براحتك .. 300 براحتك .. متصرفش منهم خالص برضو براحتك بس بشرط ميزدش حد السحب عن 735 يورو كل شهر
.
2- مستوي b1 او b2 في الالماني لو هتدرس بالالماني في الجامعه هناك
ولو هتدرس التخصص بتاعك بالانجلش هناك يبقي هيطلبوا منك ايلتس فقط
.
3- قبول جامعي من جامعه هناك انها موافقه انك تدرس عندهم
وفي نوعين من انواع القبول .. قبول نهائي و قبول مشروط
قبول مشروط يعني مثلا جامعه يكون من شروط انها تديك قبول انه يكون معاك مستوي B1 مثلا لكن انت تكون غلبان ممعاكش غير مستوي A1 بس
فتقوم الجامعه تعطف عليك وتخليك تاخد منها قبول بال A1 بس اللي معاك
و تسافر تكمل اللغة و بعدين لما توصل للمستوى اللى الجامعة عايزاه في اللغه دي فبتبدأ بقي تدرس التخصص الاساسي
أشهر الجامعات اللي بتدي قبول مشروط جامعة آخن – جامعة دورتموند – جامعه ماينز – جامعة كلاوستال – جامعة هانوفر – جامعه هايدلبرغ
——————————————————————-
طيب ياعم اعتبرني معايا فلوس الحساب المغلق ومعايا مستوي B2 .. لكن لسه برضو مش فاهم ازاي ادرس هناك وازاي اخد الفيزا عشان اسافر ؟؟
.
خطوات الدراسه هناك ( بعد ما تكون متمكن من اللغه الالمانيه / الانجليزيه ) كذا خطوة
1- تحدد التخصص اللي عايز تدرسه هناك
2- تدخل تشوف التخصص بتاعك دة موجود في انهي جامعات وانهي مدينه في المانيا
3- تبدأ تدخل علي مواقع الجامعات الالكترونيه اللي فيها تخصصك دة وتشوف شروطهم للدراسه
4- لو شروط الدراسه منطبقه عليك تروح واخد الايميل بتاع الجامعه كوبي وتراسلهم وتقولهم انك عايز قبول جامعي منهم عشان تجيب الفيزا من السفاره وتروح تدرس عندهم
5- لو الجامعه ردت عليك بالموافقه بتبدأ تتابع معاهم الاجراءات عشان يبعتولك القبول الجامعي
6- بعد ما القبول الجامعي يوصلك بتبدأ اجراءات فتح الحساب المغلق هناك في المانيا واشهر البنوك هناك يأما Detusch Bank أو تفتحه في Sparkasse
7- بعد ما يتفتح بتبدأ تحول الفلوس للحساب دة وبيتعملك تأكيد ان الحساب اتفتح بعديها ب أسبوع تقريبا وان الحساب اتعمله بلوك خلاص
8- كدة بقي معاك قبول جامعي + معاك حساب مغلق في المانيا + معاك مستوي b2 من الاول اساسا .. تروح بقي زي الشاطر كدة علي موقع السفاره وتحمل الابلكيشن بتاع الفيزا ومعاهم حاجه اسمها اقرار امني وبتحملهم وبتمضيهم
9- بعد ما بتشوف متطلبات الفيزا من علي موقع السفاره تبدأ تحضر جميع الاوراق المطلوبه و تحدد معاد في السفاره عشان تروح وتسلم كل الاوراق المطلوبه دي وتعمل مقابله هناك
ودة فيديو فيه الورق المطلوب والمتطلبات بالتفصيل الممل من اول الباسبور لغايه ورقه تأجيل الجيش
https://www.youtube.com/watch?v=dqleTHkPGWk
———————————————————————–
بقولك ايه يا محاميحو فكك من حوار الحساب البنكي دة .. هو احنا لاقيين ناكل اصلا .. خلينا في حوار الضامن .. انا جوز امي عايش ف المانيا ازاي يقدر يضمني ؟؟
شروط الضامن :
1- يكون معاه اقامه في المانيا وعايش هناك ايا كانت جنسيته يعني مش شرط يكون الماني حتي لو هندي او موزمبيقي مش مهم المهم انه يكون معاه اقامه في المانيا
.
2- يروح الضامن دة زي الشاطر كدة لمكتب الاجانب في المدينه بتاعته ويعمل ورقه اسمها Verpflichtungserklärung
ودي بتعفيهم من المسؤليه الماديه عليك وبتحمل الشخص الضامن مسؤليتك كامله ويبعتهالك بالبريد
.
3- مكتب الاجانب هو اللي بيحدد هيقبل الضامن دة ولا لأ :
يعني مفيش قاعدة ثابته او مبلغ ثابت يكون مع الشخص الضامن عشان يقبلوه كضامن
عشان بس نحسم الكلام الكتير في النقطه دي
* هل لازم مرتب الضامن يكون مش اقل من 2500 يورو ؟ مكتب الاجانب اللي هيحدد
* هل لازم يكون بيشتغل مينفعش متقاعد وبياخد معاش ؟ مكتب الاجانب اللي هيحدد
* هل ينفع شخص واحد يضمن اكثر من شخص انا واختي مثلا ؟ مكتب الاجانب اللي هيحدد
* عايز اكل سبانخ النهاردة ينفع ؟؟ برضو مكتب الاجانب اللي هيحدد
.
4- زمان كانت السفاره بتقبل ان الضامن يكون من مصر بس طبعا علي رأي الست وعايزنا نرجع زي زمان .. قول الزمان ارجع يا زمان
————————————————————–
طيب افرض دلوقتي ممعاييش فلوس الحساب المغلق ولا معايا ضامن في المانيا اعمل ايه ؟؟
ساعتها مفيش قدامك غير طريقين :
1- طريق المنح الكامله المدفوعه ..
بتدور علي منح في تخصصك وتقدم فيها والمنح دي بتكون شامله كل حاجه لكن خلي بالك فشخ مفيش منح للبكالريوس كلها منح ماجستير ودكتوراه
يعني لو انت خريج ثانوي وعايز تكمل دراسه بكالريوس هناك لازم تدفع مفيش منح ابدا
.
هأواأوأوأو بصوت ساموزين .. انت فاكر يعني المنح دي سهله ؟ مكانش حد غلب ياعم
ياعم اسعي وربنا هيكرمك .. كفايه تفخيد بقي فخدتك وصلت 90 كيلو .. انت عايز كل حاجه تجيلك وانت قاعد مفخد علي الكنبه في بيتك
.
طب ازاي ادور علي المنح دي وازاي اعرف اجيبها ؟؟
في مؤسسه اسمها DAAD ودة موقعهم https://www.daad.eg/en/ فيها كل المنح لمعظم التخصصات
ايه شروطهم ؟؟
1- ميكونش عدي علي اخر شهادة خدتها 6 سنين .. ايا كانت الشهادة .. بس تكون الشهادة في نفس التخصص اللي هتقدم عليه واللي درسته ف الجامعه
.
يعني بلاش تستنصح وحياه امك يا شيخ .. يعني مثلا متبقاش دكتور بيطري وتخصصك طب بيطري ومتخرج من 10 سنين فاتت وتقوم تعمل دبلومه في الطبيخ وتاخد شهادة في الطبيخ من اسبوع وتروحله وتقوله دي اخر شهادة اخدتها اهي .. الموظف ساعتها هيعاملك معامله سليمان الحلبي ..
.
لكن لو مثلا خريج طب بيطري من 10 سنين لكن عامل دبلومه في pets في تخصصك من سنه مثلا كدة هيعتبروا اخر شهادة ليك هي دبلومه ال pets اللي من سنه دي
.
2- يكون معاك لغه قويه ..
لو المنحه بالالماني يكون معاك اقل حاجه B2 وساعات بيطلبوا C1
ولو المنحه بالانجلش يكون معاك ايلتس 6 overall علي الاقل
.
وخلي بالك منح الماستر او الدكتوراه اللي بالانجلش عليها تنافس مميت .. عارف يعني ايه تنافس مميت ! واوقات كتير بيطلبوا خبره علي الاقل سنتين في مجالك
يعني لو عايز منحه ماستر او دكتوراه لازم تتعلم الماني لو عايز تشوف فرصه كويسه لان منح الانجلش اللي بتحتاج ايلتس بس صعبه جدا جدا جدا
.
طيب ازاي اقدم علي المنح دي ؟؟
ادخل علي موقع ال DAAD وشوف المنحه اللي تبع تخصصك للماستر او الدكتوراه وشوف شروطهم تنطبق عليك ولا لأ وبعدين ادخل علي لينك المنحه نفسها وهتلاقي مكتوب خطوات ازاي تراسلهم وتكمل الاجراءات للتقديم لان كل منحة بتختلف عن التانية في خطوات التقديم
ملحوظه :
في صديقه شخصيه ليا بتدرس هناك دكتوراه .. عملت حركه صايعه .. جابت قبول من جامعه هناك انها تدرس دكتوراه في الرقابه علي اللحوم .. وقامت راحت بالقبول دة ل DAAD عشان يمولوها وفعلا سافرت هناك بدون ما تدفع اي مليم
يعني مش شرط تلتزم ببرامج المنح اللي بتنزلها DAAD لا عادي ممكن تجيب قبول من جامعه هناك لدراسه ماستر او دكتوراه وتروح بيهم ل DAAD عشان يمولك ويديك منحه كامله
.
———————————————————————
طيب الطريق الاولاني بتاع المنح مش مناسب ليا
ايه الطريق التاني اللي بتقول عليه ؟؟
.
الطريق التاني حاجه اسمها au-pair
https://www.aupairworld.com/en/au_pair_program/germany
ال au-pair عباره عن اسره المانيه بتحتاج حد يساعدهم في شغل البيت وتربيه الاولاد وانه ياخد باله منهم
طيب انت ك واحد ايه المميزات اللي هتعود عليك لو عملت ال au-pair دة ؟؟
1- السكن والاكل والشرب مجانا عليهم
2- بيدفعولك 260 يورو شهريا مصروف ايد
3- بيدفعولك 50 يورو من مصروف كورس اللغه اللي بتاخده طول فتره اقامتك معاهم وفي بعض الاسر بيدفعولك ثمن الكورس بالكامل
4- بيكون ليك تأمين عليهم والتأمين بيكون للحاجات المؤقته
5- اوقات كتير جدا بعض الاسر بتدفعلك تذاكر الطيران كمان
6- ليك يوم في الاسبوع free ليك من غير شغل
.
مين اللي ممكن يشتغل في ال au-pair دة ؟؟ وايه شروطها ؟؟
1- غالبا الاسر بتطلب البنات لكن ممكن ولاد كمان عادي يطلبوهم
2- السن يكون من 18 ل 26 سنه .. اهم حاجه تكون مكملتش 27 سنه ابدا
3- اقل مستوي لغه الماني يكون عندك هو A1 مفيش اقل من كدة
4- المدة بتبقي من 6 شهور ل سنه
5- مش شرط خبره ابدا لكن لازم تكون محب للاطفال وبتعرف تراعيهم
6- مش مسموحلك وانت هناك معاهم تبع ال au-pair انك تشتغل ازيد من 30 ساعه في الاسبوع يعني بمعدل ست ساعات فقط يوميا
هتلاقي كل اسره حاطين شروط العقد بينك وبينهم لازم تقراها كويس قبل التعاقد
.
ايه الاجراءات طيب عشان اروح تبع ال au-pair ؟؟
الاسرة اللي بتقابلك بتبعتلك دعوة ال au-pair من الموقع وبيختموها من البلدية وبيعتلك نسخة من كشف الحساب الخاص بيهم و صورة من ال ID بتاعهم وكمان صورة من التأمين الصحي والاجتماعي بتاعهم
.
ودة فيديو بيشرح بالتفصيل الممل تجربه بنت مصريه شغاله حاليا تبع ال au-pair في المانيا
https://www.youtube.com/watch?v=kEGOR2h5eVs
.
معقول الدنيا وردي كدة مفيش خوازيق ابدا ؟؟
الفكره كلها ان معظم الاسر بيكونوا عايزين حد فورا عشان يرعي البيت ويرعي ولادهم عشان كدة اغلبهم مش بيختار حد من الشرق الاوسط عشان مش يستنوا وقت طويل علي ما انت تاخد معاد من السفاره وتقدم الورق وتروح وتوصل وتتأقلم وموال كبير
ف بيستسهلوا انهم بيجيبوا حد من الاتحاد الاوروبي جنبهم من النمسا ولا سويسرا اقرب
لكن اسعي وربنا يكرمك متعرفش الخير فين ولا الرزق منين
———————————————————————-
طب انا هجبهالك علي بلاطه يا دكتره .. انا ممعاييش غير هما ال 150 الف جنيه تحويشه العمر ولو دفعتهم في الحساب المغلق في اول سنه .. اكيد مش هعرف ادفعهم في السنه التانيه والتالته والرابعه عشان اجدد الاقامه .. اعمل ايه ساعتها ؟ ازاي ادبر فلوس السنين اللي بعد كدة ؟؟
.
بص يا معلم .. في كل مدن المانيا بلا استثناء لو اول مرة هتدرس لازم هتدفع ال 8640 يورو
لكن وقت التجديد بقي .. رسوم تجديد الاقامة بتختلف من مدينة ل اخرى
في مدن وقت التجديد بتطلب 8000 يورو من اول وجديد .. وفي مدن بتطلب 4000 يورو بس .. وفي مدن بتطلب 2000 يورو بس
وبما انك هيكون معاك 735 يورو شهريا بتصرف منهم + بتقدر بفيزا الدراسه انك تشتغل شغل بارت تايم مع الدراسه يعملك حد ادني 450 يورو في الشهر + دة غير شغل الفريلانسر اللي من علي النت ال ممكن تعمله مع الدراسه وتكسب منه كتير جدا
يعني انت ممكن بشويه تعب تقدر توفر ال 2000 ولا ال 4000 يورو وتجدد الاقامه عادي جدا كل سنه من المدن اللي بتطلب رسوم قليله وقت التجديد
احسبها كويس وخطط صح واسعي كتير واتعب وهتلاقي ربنا بيفرجها عليك من كل ناحيه
——————————————————————-
طب انت بتقولي اني ينفع اشتغل مع الدراسه
ازاي بشتغل مع الدراسه والاجور هتبقي قد ايه وبياخدوا ضرائب عليا ولا لأ ؟؟
* انت بكارنيه الطالب بيكون الحد الادني للشغل 10 يورو في الساعه ( بتختلف حسب كل مدينه )
بيحق ليك شغل 240 يوم خلال السنه بارت تايم و ممكن تعمل بشغل البارت تايم دة 450 يورو شهريا فيما فوق
.
* طلاب اللغه والسنه التحضيريه ملهمش شغل الا في الاجازات اللي بين السمسترز يعني لو رايح تدرس لغه او سنه تحضيري لازم تكون دفيان ومستريح ماديا او تعتمد بقي علي شغل الفريلانسر بس تكون متميز اوي فيه عشان تعرف تكسب منه وتصرف علي نفسك هناك
.
* لما بتخلص اجراءات الاقامه بتروح ل موقع منظمة studentenwerke ودي بتساعدك انك تلاقي شغل بارت تايم وانت طالب
ودي مواقع تساعدك علي انك تلاقي شغل هناك وانت طالب
http://www.studentenwerke.de
http://www.stepstone.de
https://jobboerse.arbeitsagentur.de
.
* الضرايب بتتفرض عليك بدايه من 900 يورو فما فوق يعني طول ما انت تحت ال 900 هتبقي تاكس فري
لكن انت بتدفع 9% تأمين من اصل اي مرتب بتاخدة يعني اللي بيتخصم من مرتبك اسمه تأمين مش ضرايب لكن الضرايب بتتفرض علي اللي دخله من 900 يورو فيما فوق
—————————————————————-
طب بقولك ايه يا ابو حميد انا عايز اسافر بسرعه ومش طايق اقعد هنا وانا معايا الفلوس بالكامل الحمد لله لكن لسه عايز اتعلم انجلش واخد ايلتس و زفت أو اتعلم الماني في جوته وموال اسود
مفيش طريقه اخرج بيها من غير ما استني شهور و سنين اتعلم فيهم B2 الماني أو ايلتس ؟؟
.
الحل الوحيد انك تدور علي جامعه هناك تكون دراسه التخصص بالانجلش ومش طالبه ايلتس
يعني تدور علي جامعه هناك بتدرس تخصصك ويكون بالانجلش ومش بتطلب ايلتس منك
وقتها السفاره مش هتعارض ابدا لانك واخد قبول من الجامعه انهم مش عايزين ايلتس ودراستهم بالانجلش ولكن ولكن ولكن ولكن :
1- تجيب شهادة من جامعتك ان دراستك كانت بالانجلش ايام الجامعه
2- لازم تتكلم كويس فشخ في الانترفيو
يعني ميبقاش هتدرس بالانجلش في المانيا و ممعاكش شهادة ايلتس و فوق كل دة تبقي مش عارف تتكلم كلمتين علي بعض في الانترفيو بالانجلش !
.
مهو كدة السفاره هتقولك انت ازاي هتروح وتتعامل هناك بالمنظر بتاعك دة .. يعني لازم تثبتلهم انك جاد في تعلم اللغه وانك هتروح وهتتعلم الماني هناك في الاجازات وان اصلا الانجليزي بتاعك كويس فشخ لكن مش فاضي تمتحن ايلتس وبتاع دلوقتي
.
شوفت برامج للدراسه في جامعه Leipzig University الدراسه فيهم بالانجلش ومش بتطلب ايلتس كمان واكيد لو دورت كويس هتلاقي برامج كتير في جامعات كتير بنفس الحوار
———————————————————–
اكثر سؤال هيتسأل في الكومنتات انا عارف :
1- انا تخصصي فلان الفلاني ازاي اعرف الجامعات اللي هناك اللي بتدرس التخصص دة ؟
حضرتك بكل بساطه هتدخل علي جوجل هتكتب اسم تخصصك وفي الاخر تكتب جمله Universities in Germany وهتظهرلك كل الجامعات اللي فيها تخصصك
.
يعني مثلا عايز تدرس طب بيطري في المانيا هتقوم جايب عمو جوجل وتكتب فيه
veterinary medicine universities in germany
وبعدها بتدخل تشوف شروط الدراسه ولو بتنطبق عليك الشروط هتروح تراسلهم عشان تعرف تجيب قبول منهم
.
طب افرض بعد ما عملت كل دة وبرضو مش عارف تلاقي الجامعات اللي فيها التخصص اللي عايز تدرسه تعمل ايه وقتها ؟؟
ولا تزعل نفسك يا سيدي
الموقع دة https://www.study-in.de/en/
موقع بحث زي جوجل كدة فيه كل الجامعات الالمانيه وكل التخصصات في كل الجامعات .. ما عليك الا انك تدخل تكتب اسم التخصص واسم الدرجه العلميه اللي عايز تدرسها وهو هيطلعلك افضل برامج في افضل جامعات للتخصص دة
موقع مغتربين دوت كوم : جميع حقوق الموضوع محفوظة للأستاذ AHMED MOHAMED