جميع طرق تحويل أموالك من إيطاليا إلى مصر

موضوع مهم لكل مغترب عنده أسرة أو عائلة فى بلده ومحتاج يرسل لهم مصاريفهم
طبعا أغلب الناس بتلجأ إما إنها تبعت مع حد نازل مصر ( والموضوع دا مابقاش فيه ثقة فى حد علشان تخاطر وتعمله ) .

وفيه ناس بتلجأ لمكاتب الصرافة اللى بتحول العملة عن طريق Ria , moneygram , westrn union لكن المشكلة إن الإسبيزة بتكون عالية فيه اللى بياخد على كل 1000 يورو ( 30 ) يورو وفيه اللى بياخد عليهم ( 20) يورو وهنا لازم تاخد بالك الفلوس هتوصل مصرى ولا يورو ولا دولار !

مثلا ويسترن يونيون بتحولهم لدولار ومن بعدها لمصرى فالتحويل دا بيخسرك من قيمة المبلغ غير المصاريف اللى انت دفعتها هنا ، أما ريا ومونى جرام بتتبعت يورو أو مصرى حسب انت ماتختار أثناء الإرسال وطبعا بتحدد المرسل إليه وبيستلم من بنك القاهرة أو بنك المصرف المتحد.

طرق توفر للمغتربين إرسال مصاريف أهلهم بطرق سهلة وغير مكلفة

الطريقة الأولى

لو ماعندكش أى حساب بنك او بوسطة هتلاقى مكاتب البوسطة فى ايطاليا بتوفرلك تبعت عن طريق moneygram أى مبلغ لبلدك بسعر أقل من مكاتب الصرافة يعنى مثلا الألف يورو بتدفع عليهم (15) يورو اسبيزة.

الطريقة الثانية

لو عندك حساب بنك أو بوسطة هتحمل أبليكشن moneygram على تليفونك وتدخل ببياناتك وبتوجه التليفون على بطاقتك الشخصية أمام الكاميرا وبتكتب رقم تليفونك وايميلك وبيسمح لك البرنامج ترسل الفلوس من خلاله لأى مكان داخل وخارج ايطاليا بتحدد البلد اللى هتبعت عليها وبتحدد المبلغ اللى هتبعته وعاوزه يوصل مصرى ولا دولار ولا يورو زى ماهو وبتكتب بيانات الشخص اللى بتحول عليه يستلمهم مباشر أو ممكن تبعتهم على حساب بنكى عادى والاسبيزة بتكون رمزية جدا مثلا ألف يورو بياخدوا منهم اسبيزة ( 2,99 )وبيوصل الباقى 997 وبتدفع الفلوس عن طريق كارت البنك أو البوسطة وبيوصل فى وقتها للطرف الآخر.

الطريقة الثالثة

ممكن تنزل أبليكشن Ria على تليفونك ولكن الاسبيزة فيه زى البوسطة على الألف يورو (15) يورو وبرضو بتدفع من حساب البنك أو البوسطة.

الطريقة الرابعة

لو عندك حساب فى بنك انتيزا سان باولو intesa san paolo بيوفرلك طريقتين للتحويل

• الطريقة الأولى  تدخل على الكاسة تطلب تحويل مبلغ لمصر عن طريق خاصية Get money to my family وبتحدد المرسل اليه وبتقدر تحول لحد 5000 يورو والاسبيزة بتكون 2,5 يورو. 

• الطريقة الثانية يكون فيه حساب فى بنك اسكندرية فى مصر ممكن يكون باسمك لو بتبعت فلوسك لحسابك أو باسم أى حد هناك لو بتبعت مصاريف وبتنزل ابليكشن البنك على تليفونك ومنه تقدر تبعت بونيفكو على حساب بنك اسكندرية وتحدد ان الاسبيزة عليك وان المبلغ يوصل باليورو وتكتب رقم حساب واسم المرسل اليه وبيوصلوا فى خلال من يومين ل 5 أيام وتقدر تحول أى مبلغ لمصر والاسبيزة بتكون على حسب السن يعنى لو حضرتك تحت 35 سنة وهتبعت مثلا 5000 يورو هتدفع عليهم 19 يورو اسبيزة ، لو سنك فوق 35 سنة هتدفع عليهم 54 يورو.

 ملحوظة 

 لو الحساب فى بنك تانى غير بنك اسكندرية الاسبيزة بتكون عالية ودا لان بيحصل جيرو للفلوس من بنك لبنك لان فيه بنك وسيط لكن بنك اسكندرية له تعامل مباشر بدون وسطاء مع انتيزا سان باولو لانه فرع منه.

 بيوفرلك تبعت من خلال ابليكشن البنك عن طريق ويسترن يونيون لو مفيش حساب فى بنك فى مصر