نقدم لكم أفضل أماكن التنزه والترفيه فى الأعياد فى إيطاليا :
حدائق الحيوانات
ناس كتير بتسأل نخرج أطفالنا فين فى العيد ؟
فرحة العيد لأطفالنا بتبدأ بصلاة العيد و العيديه ، ونصيحه احرص على اصطحاب اطفالك لصلاة العيد و كمان العيديه لإدخال السرور عليهم😍
وبعد كده
هتودينا فين يا بابا 😍
تقريبا كل الاطفال بيحبوا يروحوا مكانين هم : اما حديقة حيوان أو ملاهي لألعاب الأطفال.
تعالى أقولك على أقرب أماكن من ميلانو مناسبه للأطفال :
🟢 Parco Faunistico Le Cornelle
العنوان :
Via Cornelle 16, 24030 Valbrembo
مواعيد الزيارة:
من 9 صباحا إلى 5 مساءا
دى حديقة حيوان بالقرب من برجمو ، على مساحة كبيرة تضم 120 نوع من الحيوانات ، فرصة لقضاء يوم جميل مع الأطفال و ممكن تعمل جولة بقطار الأطفال(طاف طاف) وكمان للكبار 😀
أسعار تذكرة الدخول :
أقل من سنتين مجانآ
الأطفال من عمر 3 سنوات حتى 11 سنه السعر 12 يورو
من عمر 12سنه فيما فوق 19 يورو
🟢Safari Park – Pombia
العنوان :
Via Larino, 3, 28050 Pombia NO
مواعيد الزيارة :
10 صباحا إلى 6 مساءآ
هى حديقة حيوان فى منطقة نوفارا ، هى حديقة تحاكي البيئة الطبيعية للحيوانات بحريه و بدون أقفاص، والزائر يتنقل بسيارته داخل المكان ، و تشاهد الحيوانات عن قرب ، والسير بالسيارة يكون ببطأ شديد .
فيها كمان أكواريو للأسماك والتماسيح وغيرها.
وفى كمان ألعاب للأطفال
أسعار تذكرة الدخول:
أقل من أربع سنوات مجانآ
الأطفال من 4 حتى 13 سنه السعر 12 يورو
من عمر 13 سنه فيما فوق 17 سنه
الملاهى
هنتكلم عن أماكن فيها ألعاب للأطفال بالقرب من ميلانو .
🟢Leolandia
أشهر متنزه و ملاهي فى لومبارديا والاختيار الأول تقريبا لقربها الشديد من ميلانو ، تضم عددا كبيرا من الألعاب المناسبه للأطفال و الكبار ، وعروض فنيه وسحريه وبعض الحيوانات .
ويوجد قطار توماس و بيت ماشا والدب وهو من الأماكن المحببه للأطفال ، و يوجد مكان لسوبر بيجامينى وعرض خاص بهم.
الإسم القديم لها minitalia لأنها تضم منطقه فيها مجسمات مصغره لأشهر الأماكن والآثار فى إيطاليا وبعض الشخصيات
المواعيد :
من 10 صباحا إلى 6 مساءآ
أسعار تذاكر الدخول :
أسعار الدخول بالطول وليست بالسن😀
طول 90 سم إلى 119 سم السعر 33,50 يورو
طول 120 سم 38,50 يورو
الكبار 39,50
واحيان كثيرة بيكون فى عروض وتخفيضات وكمان ممكن ترجع تانى مجانا لكن فى أوقات معينه من السنه.
العنوان :
Via Vittorio Veneto 52, Capriate ( Bergamo)
🟢 Gardaland
طبعا دى أشهر مدينة ملاهي فى إيطاليا وتضم العدد الاكبر من الألعاب و متنزه و قريبه من بحيرة lago di Garda الشهيرة .
المشكلة انها بعيدة شويه ، لكن من أمتع الأماكن المحببه للأطفال.
العنوان :
Via Derna 4 Castelnuovo del Garda( Verona)
المواعيد:
من 10 إلى 6 مساءآ
أسعار التذاكر:
الأطفال 43يورو
الكبار 47 يورو
و أقل من متر طول مجانا
احيانا يشترط الحجز اون لاين قبل الذهاب .
🟢 سامعك ياللى بتقول ⬇️
Europark Milano Idroscalo
رغم ان المكان دا الأقرب لسكان ميلانو لكن للاسف لا يفتح طوال كل الايام ، ومواعيده بتختلف من فترة لأخرى طوال العام، وأنصح دائما بمراجعة المواعيد كل مره قبل الذهاب إليه.
الفترة دى بيفتح فقط الجمعه والسبت والأحد و كمان مواعيده متأخره ، ويوم العيد هيكون مغلق .
هو أيضا مكان فيه لعب العاب اطفال كثيرة.
عموما….
العنوان:
Via Rivoltana, Segrate ( Milano)
المواعيد:
الجمعه 8:30 مساءا إلى 12:30صباحا
السبت 2:30 ظهرا إلى 1 صباحا
الأحد 11 صباحا إلى 12 مساءآ
بقية الايام مغلق
أشهر الأماكن السياحية للتنزه بالقرب من ميلانو
بعد أن تكلمنا عن زيارة حدائق الحيوان والملاهي اليوم هنتكلم عن أشهر الأماكن السياحية القريبه من ميلانو .
🟢lago di Como
أقرب مكان لميلانو مناسب للأسر والأطفال ، اهم ميزه فيه سهولة الوصول إليه سواء بالقطار مباشرة أو بالسيارة حوالى أربعين دقيقة .
كل اللى بيروح الكومو تقريبا بيروح مباشرة على البحيرة ، وفعلا البحيرة جميلة وتم اختيارها البحيرة الاجمل فى العالم عام 2019.
لكن فى أماكن تانيه فى كومو ما حدش هيقولك عليها غيرى!
اول ما توصل الكومو أمام محطة القطار هتلاقى البحيرة ممكن تمشى يمين على شاطئ البحيرة و تستمتع بالمنظر، وبعد كده على يمينك هتلاقى القطار اللى بيطلع الجبل Funicolare
ممكن تطلع فى تجربة جميلة و ممتعه للأطفال.
بعد كده ترجع تانى لمكان ما وصلت عند محطة القطار تحديدآ جهة الشمال و تتمشى على البحيرة ،
ممكن تأخد مركب فى جولة داخل البحيرة مدتها تقريبا ساعه و ممكن تنزل فى اى محطه تقضى بعض الوقت وترجع تانى .
لما تتمشى على البحيرة هتوصل عند الإستاد، هناك هتلاقى parco فى لعب للأطفال ممكن تقضى بعض الوقت ،هناك فى ناس بتبيع ايس كريم والفيشار وكمان غزل البنات
وتكمل مشى لحد ما توصل ل villa olma
و المكان هناك جميل و ممكن تقعد هناك وتستمتع بمنظر جميل .
🟢أماكن بقى ماحدش قالك عليها فى الكومو 😀
Museo civico
دا متحف جميل موجود داخل الكومو
العنوان
Via Armando Diaz 84, Como
ازاى توصله ؟
وانت أمام المراكب اللى بتعمل جولة بحيريه هتلاقى بياتسا كبيرة على شمالك ، ممكن تتمشى على رجليك و تعمل جولة والبلد جميلة والمباني معظمها أثريه.
فى طريقك للمتحف هتلاقى il duomo بتاع الكومو المنظر جميل جدا وطبعا فى محلات كتير للتسوق و كمان ماكدونالدز .
بعد كده هتتمشى علشان توصل للمتحف
خليك فاكر ممنوع الدخول بالسيارة والغرامه أكثر من 90 يورو.
المتحف بيضم آثار رومانيه ويونانيه و تاريخ الكومو وكمان مصريه
اه والله مصريه😍
عموما هو مناسب جدا للأطفال.
سعر التذاكر
5 يورو للكبير
3 يورو للصغير
🟢أقولك بقى على مكان حكايه ممكن تزوره لكن لازم عربيه
ممكن تطلع الجبل بالسيارة فى مكان اسمه
Punto panoramico · Brunate
دا تقريبا أعلى نقطه فى كومو والمنظر فوق جميل جدا و فى parco جميل و ممكن تقضى وقت رائع و تلتقط أجمل صور فى حياتك .
تحذير : اللى بيخاف من طلوع الجبل بالسياره بلاش يطلع
واللى سيارته تعبانه بلاش يطلع
واللى مش متمكن من السواقه بلاش يطلع
🟢اخيرا فى ناس كتير سألتنى عن تمثال (اليدين) الشهير واللى بنشوفه فى الصور وفين مكانه فى الكومو .
النصب التذكارى دا اسمه le mani
مكانه
Via Tokamachi ، Como
أمام محطة قطارات سان جوفانى
خلى بالك الكومو فيها محطتين للقطارات واحده أمام البحيرة و واحدة خلف الاستاد.
تمثال le mani تم صنعه تخليدا لضحايا الخدمة المدنيه والعمل من المدنيين والعسكريين.
ودى تقريبا كانت اهم الأماكن السياحية فى الكومو.
بقلم أ/ أبو الخير الفرماوى
