مش حننكر إن نسبة كبيرة من المغتربين دلوقتي بيتجه لحجز تذكرة الطيران اون لاين بنفسه علشان يوفر تكاليف عمولة مكاتب السياحة و كمان تكون ليه حرية اختيار التاريخ الأرخص . و يقدر و هو في بيته يعمل مقارنه ما بين أكتر من 100 موقع حجز اون لاين , بس فيه شوية حجات مهمه أوي لازم ناخد بالنا منها و احنا بنحجز تذكرة الطيران أون لاين وهم كالآتى :1-العنصر الأساسى فى الحجز وجوجل مواقع الحجز هو موقع www.skyscanner.com وظيفته يبحثلك عن كل شركات الطيران المسافره للوجهه اللي حددتها و يجيبلك سعرالتذكره اللي أخترتها في أغلب مواقع الحجز العالمية . ************************** 2- بعد ما تختار رحلة الطيران المناسبة ليك من موقع سكاي سكانر حيظهرلك مواقع حجز مختلفة كتير يحولك
عليها علشان تكمل عملية الحجز مثل “expedia, ebookers, airtickets, travelstart, gotogate“و غيرها
************************* 3- بعض المواقع غير موثوق فيها و خلي بالك مش كل موقع بيعرضلك سعر رخيص تتسرع و تدخل تحجز منه , ممكن جدا بعد ما تعمل الحجز و المبلغ يتخصم بالفعل من الكارتا دى كريدتو أو الكارتا بريبجاتا , التذكرة متوصلكش , *طيب نعرف ان الموقع موثوق منه ازاي :
• اول حاجه تدخل على موقع www.trustpilot.com و تكتب اسم الموقع اللي عاوز تحجز منه و تقرأ رأي الناس فيه و تجاربهم عليه. • تاني حاجه تدخل على موقع tripadvisor.com و تعمل نفس الكلام و تشوف رأي الناس لو لاقيت الأغلب من الناس بيقوله أنه موقع موثوق فيه تدخل تتعامل معاه لكن لو لاقيت أراء كتير سلبية الأفضل تتجنبه • تتأكد هل الموقع متوفر فيه رقم اتصال دولي تقدر تكلمهم عليه ؟ و ياريت تجرب تتصل بيهم و تشوف لو حد حيرد عليك , كل ما كانت فيه وسائل اتصال أكتر كل ما كان الموقع ثقة أكتر • هل الموقع assicurato و لا لأ ؟ يعني مكتوب قبل عنوان الموقع إنه مؤمن فتقدر تستخدم عليه بطاقات أئتمانيه بدون مشكله لأن معلومات البطاقات الأئتمانيه في الحالة دي عند التعامل على الموقع بتكون مشفره فميقدرش يستخدم البطاقة في سرقة اموال منها , لو ملقتش الكلمه دي مكتوبه إحذر انك تستخدم الكارتا دى كريدتو عليه ويفضل كمان فى العموم إستعمال كارتا بريبجاتا زى بوسطا باى بتاعة البوسطة الصفرا وتحط المبلغ ع اد التذكرة بالظبط . ************************** 4- احترس بعض المواقع بيكون عليها السعر غير محدث فلا تتسرع و تختار أرخص سعر موجود لأن احتمال كبير يكون السعر الظاهر نتيجة بحث قديم و لم يتم تحديثه على الموقع , لما تدخل على الموقع و تكتب كل البيانات و توصل لصفحة الدفع حتلاقي السعر اتغير تماما . ******************** 5- لا تتسرع و تحكم على السعر رخيص أو غالي على أي موقع غير لما توصل لأخر خطوة و تختار طريقة الدفع و تشوف المبلغ الاجمالي طلع كام لأن غالبا حيتم اضافة خدمه أو ضرائب اضافية غير عمولة البنك و الكارتا دى كريديتو ( بيتم تحديدها حسب البنك ). *********************** 6- مش كل مواقع الحجز بتحجزلك التذكره مع شنطة و خاصه في الطيران المنخفض التكاليف “الشارتر زى ريان اير مثلا ( وساعات اضافة شنطة لحجزك ممكن تكلف أكتر من ثمن التذكرة خلى بالك ) . ***************************
*ملاحظات أخيرة :
عملية حجز تذكره الطيران اون لاين مش صعبة و في نفس الوقت مش سهلة و ناس كتير للأسف بتضيع عليهم فلوس كتير نتيجة أخطاء بسيطه أثناء الحجز زي كتابة الأسم خطأ أو تبديل الأسم الأول مكان الأخير أو تحط تاريخ مش صحيح أو بيانات جواز سفر غير صحيحة او متكونش عارفه سياسة تعديل أو الغاء التذكره ( لأن غالبا مش بتكون واضحه أثناء الحجز في بعض المواقع) و في الأخر أي تصحيح أو تعديل للأسف حيكلفك مبالغ اضافيه كتير و ممكن يكلفك تمن التذكره بالكامل و لو حتعمل الموضوع ده بنفسك أنصحك
تاخد بالنصايح المذكورة و لا تستهين بالموضوع
لو مش هتعرف تحجز أونلاين ممكن تسنخدم الموقع لمعرفة متوسط أسعار التذاكر تقريبا فى السوق من غير ما تلف على كذا أجنسية سفر وكمان تقدر تعرف إنت إتنصب عليك فى التذكرة ولا لأ لو سعرها مبالغ فيه .
يفضل دائما وقت الحجز إستخدام كارتا بريبجاتا زى ما قولنا قبل كدا وكارتا بوسطا باى أمان جدا .
أما بتحجز تذاكر أونلاين بيبقى فى حاجة اسمها شيك ان بتعمله أونلاين قبل السفر مباشرة بيوم ياريت متنساش تعمله وعامة شركة الطيران بتفكرك بيه على الإيميل .
أما بتحجز أونلاين بتقدر تختار الوجبة عادى وعدد الشنط والمكان فى الطيارة وكل حاجة عادى
لو حصلك أى مشكلة وعاوز تأجل التذكرة أو تلغيها بتروح لشركة الطيران نفسها ملكش علاقة بموقع الحجز يعنى لو حاجز على الإيطالية بتشوف المقر بتاعهم وبتلجألهم وهكذا .وأخيرا إنتظرونا فى شرح كامل بالفيديو من الصفر حتى النهاية لكيفية حجز تذكرة طيران أونلاين وإزاى تجيب أرخص سعر للتذكرة ولو شايف الموضوع مفيد إنشره على صفحتك .
