ما هو دخل المواطنة REDDITO DI CITTADINANZA

دخل المواطنة هو  بحث إجتماعي بحالة الأسرة وممتلكاتها ودخلها السنوي .

في حالة عدم قدرتها على تلبية احتياجاتها المعيشيه تقوم الدولة الايطالية بدعمك ماديا عن طريق كارت خاص بالبوسطه بيتم تحويل عليه مبلغ شهري عشان الأسره تقدر تعيش .

في المقابل الدوله الايطاليه بتبحث ليك عن فرص عمل وتعرضها عليك وفي حالة رفضها بدون أسباب مقنعه بيتم إيقاف التحويل للفلوس على الكارت.

 

يهدف دخل المواطنة أيضًا إلى تحسين التوافق بين العرض والطلب على العمل ، وزيادة فرص العمل ومكافحة الفقر وعدم المساواة.

 

 

ما هي شروط التقديم على دخل المواطنه؟

 

1- مواطن إيطالي أو جنسية إتحاد أوروبي أو إقامة دائمه ويكون مقيم ( ريزيدنسا عشر سنين على الأقل) وآخر سنتين يكون ريزيدنسا متصلة بدون إنقطاع.

2- يمتلك إيزي ISEE أقل من ٩٣٦٠ يورو.

3- لا تمتلك أي عقارات غير محل سكنك بقيمة لا تزيد عن ٣٠ ألف يورو.

4- فلوسك اللي في البنك من ودايع او حتى مبلغ متروك في الحساب لا تزيد عن ٦٠٠٠ يورو وبتزيد القيمه بزيادة عدد أفراد الأسرة حتى حد أقصى ١٠٠٠٠ يورو وتزيد كمان بقيمة ٢٠٠٠ من الطفل التاني فأكثر ولو فيه شخص لا قدر الله عنده إعاقة تزيد بقيمة ٥٠٠٠ يورو.

  ملحوظه هامة  

كل الأرقام والحسابات دي بينطلب لسنة ٢٠١٩ يعني لسنتين قبل تقديم الطلب .

 

5- الدخل السنوي للأسرة لا يزيد عن ٦٠٠٠ يورو وبتزيد القيمة على حسب عدد أفراد الأسرة كالآتي :
– فرد واحد = ١
– فرد تاني أكبر من ١٨ سنه = ٠.٤
– فرد أصغر من ١٨ سنه = ٠.٢
– حد أقصى لأي عدد أفراد لا يزيد عن ٢.١

مثال أسره مكونه من أب وأم ( أكبر من ١٨ سنه) وطفلين (أصغر من ١٨ سنه)
يبقى ٦٠٠٠ × ( ١ + ٠.٤ + ٠.٢ + ٠.٢ = ١.٨)
يبقى ٦٠٠٠ × ١.٨ = ١٠٨٠٠ الحد الأقصى لدخل الأسره السنوي.

6- عدم وجود أي سياره جديده موديل السنه لأي فرد من الأسرة.

7- عدم وجود أي سياره أعلى من ١٦٠٠ CC أو موتورينو  MOTOVEICOLI  أعلى من ٢٥٠ CC

8- عدم امتلاك اي فرد من الأسرة مراكب او بواخر بحرية.

أي شخص بيتم قبول طلبه يعتبر وكأنه موقع عقد مع مكتب العمل الإيطالي للبحث عن أي فرص عمل.

يجب عليك أن تكون متاح وجاهز لأي مقابلة وأيضا جاهزيتك لقبول أي مهام توكل لك من جهة المجلس المحلي التابع ليك (الكمونة MUNICIPIO)

الاستثناء بيكون للناس اللي أكبر من ٦٥ عام (معاش) أو أشخاص لديهم إعاقة او أشخاص بيقوموا برعاية أطفال أقل من ٣ سنوات.

كيف يتم حساب دخل المواطنة  ؟

 

قامت وزراة العمل الإيطالية بعمل  جدول على حسب عدد أفراد الأسرة من أطفال أو أكبر من ١٨ سنة و اذا كانت الأسرة تعيش في منزل إيجار بتزيد قيمة دخل المواطنة شهريا بمبلغ ٢٨٠ يورو للمساعدة في الإيجار  كالتالي؛

– فرد واحد = ٥٠٠ + ٢٨٠ للإيجار = ٧٨٠ يورو
– فرد وطفل = ٦٠٠ + ٢٨٠ للإيجار = ٨٨٠ يورو
– فردين كبار = ٧٠٠ + ٢٨٠ للإيجار = ٩٨٠ يورو
– فردين وطفل = ٨٠٠ + ٢٨٠ للإيجار = ١٠٨٠ يورو
– فردين وطفلين = ٩٠٠ + ٢٨٠ يورو للإيجار = ١١٨٠ يورو
– فردين وتلات أطفال = ١٠٠٠ + ٢٨٠ يورو للإيجار = ١٢٨٠ يورو
– بعد كده زود ٥٠ يورو لأي فرد جديد وبحد أقصى ١١٠٠ لو فيه إعاقة لأي فرد في الأسره + ٢٨٠ يورو مساعدة الإيجار

و هكذا تقوم الإنبس INPS و وزارة العمل بحساب دخل المواطنة  في حالة إن الشروط تنطبق عليك وطلبك تم الموافقة  عليه .

ملحوظة هامة

اذا كان  أي شخص في الأسرة له أي مصدر دخل وفي نفس الوقت شخص تاني من الأسرة بياخد دخل المواطنة تختلف طريقة  الحساب .

بمعنى إنهم هيخصموا الجزء اللي بيتقاضاه الشخص اللي عنده مصدر دخل و يتم ارسال الفرق لك على كارت دخل المواطنة.

 

مثال : لو حد بياخد مثلا اي دخل شهري بقيمة ٣٠٠ يورو وحد من الأسره بياخد دخل المواطنه والأسره كلها تستحق مثلا ٩٠٠ يورو دخل مواطنه يبقى اللي هيدخل الحساب في كارت دخل المواطنه ٦٠٠ يورو ( ٩٠٠ – ٣٠٠) طبعآ ده تقريبياٌ مش بالظبط لغرض توصيل المعلومة.

 

ما هي طرق التقديم على دخل المواطنة؟

– التقديم عبارة عن ملئ بياناتك في تلات موديلات MODULE وتعتبر معظمها إقرارات بصحة كل البيانات التي تم تم تسجيلها و يتم ذلك عن طريق :

1-  الاسبيد SPID على الموقع الخاص بدخل المواطنة 
اضغط هنا

2-  الاسبيد SPID على موقع الإنبس INPS
اضغط هنا

3-  مكاتب الكاف CAF – PATRONATO

 

ما هي المشتريات التي يمكننا الحصول عليها  بكارت دخل المواطنة؟

 

 اي مشتريات للمواد الغذائية الأساسية من أي سوبر ماركت.

دفع قيمة الإيجار بتاعك أو قسط قرض البيت الخاص بيك.

دفع كل أنواع الفواتير الخاصة بالغاز والكهرباء والمياه

عن طريق البوسطة POSTE.

شراء كتب أو دفع تمن البنزين.

شراء العاب للأطفال.

شراء موبيليا للبيت  (تكون من الأغراض الاساسية

وما ينفعش يكون ماركات عالية)

شراء تليفونات أو تابلت أو كمبيوتر بس أهم حاجه يكون من أقل الإمكانيات

(للضروره)يعني ما ينفعش تروح تشتري بفلوس دخل المواطنه آيفون مثلاً .

دفع اي مبالغ خاصة بأي كشف طبي أو تحاليل و اشعة .

شراء اي أدوات كهربائية منزلية وأهم حاجه تكون ذات أحجام صغيره

( يعني ما ينفعش تروح تشتري بكارت المواطنه بوتجاز ولا غساله أحدث موديل )

شراء اي أدوية من الصيدليات وتدفع اشتراكات المواصلات

و تدفع حساب البار والمطاعم واي أدوات مدرسية للأولاد.

دفع فلوس خاصه بأي كورسات تعليميه سواء من قطاع خاص أو حكومي

وكمان ينفع تحجز بيه تذاكر للسينما.

 

الحالات التي يمنع استخدام كارت دخل المواطنة بها

 

 لا يمكن دفع أي نوع من أنواع التأمين ASSICURAZIONI سواء للعربيه او المتورينو أو قسط التأمين على الحياة.

– يمنع إستخدام الكارت في اي نوع من أنواع المراهنات والقمار وكروت الحظ.

– ممنوع إستخدام الكارت في شراء اي منتجات جلديه عالية الجودة .

– لا يسمح  باستعمال الكارت سواء في إرسال فلوس أو حتى دفع رسوم التحويل خارج ايطاليا .

– ممنوع شراء اي مجوهرات او مشغولات ذهبيه أو منتجات فنيه عالية القيمة .

– في حالة استخدام الكارت في الممنوعات  الإنبس هيوقف الكارت وهيلغي دخل المواطنة.

 

 

إجراءات الانبس للتأكد من استحقاقك لدخل المواطنة

 

1-يبدأ الإنبس بمراجعة كل بياناتك من الدخل والايزي ISEE والريزدنسا الخاصه بك و بالأسرة ومراجعة كل املاكك من عقارات وسيارات وبواخر ومراكب وفي معظم الحالات الكنترول في البداية بيبقى روتيني وغير دقيق لغرض إنهاء الإجراءات لإن دي مساعدة المفروض إنها للأسر المتضرره وعندها مشاكل في توفير احتياجاتها المعيشية الأساسية.

2- بعد قبول الطلب الإنبس يرسل اليك إخطار بقبول الطلب وبداية من الشهر اللي بعد التقديم بيبدأوا في تحويل المبلغ المستحق على كارت خاص بالبوسطة بتروح تستلمه منهم وبتاخد الباسورد وتفعل الكارت.

3- في خلال ٣٠ يوم من قبول الطلب تسجل نفسك في مكتب العمل التابع ليك CENTRO PER L’IMPIEGO وطبعا ممكن كمان عن طريق الباتروناتو بيسجلوا إسمك على قوائم الناس اللي بتحصل على دخل المواطنة وبكده تعلن جاهزيتك لقبول اي فرص عمل تعرض عليك خلال فترة حصولك على دخل المواطنة.

4- يعرض مكتب العمل  عليك عن طريق مراسلات او خطابات او اتصالات او ايميلات حتي ثلاث فرص عمل بتختلف في بعدها عن مكان سكنك على مراحل مدة حصولك على دخل المواطنة.

 

 

ماذا يحدث بعد عدم الاستجابة لفرص العمل المقدمة من مكتب العمل التابع اليك ؟ 

 

– تقوم الكمونه (المجلس المحلي) MUNICIPIO التابع ليك بتكليفك بالاستعداد لأي مقابلات تطلب منك .

وارد ينطلب منك تقوم بالمساهمة في الخدمات المدنية التابعة للمجلس المحلي للمنطقة الخاصة بك يعني ممكن يتصلوا عليك ويقولوا تعالي في ميعاد عشان عندهم كورس او دوره تدريبيه في مجال تخصصك ولازم تحضرها.

في حالة عدم الاستجابة لطلب حضورك  يتم اتحاذ الاجراءات الأتية : 

1- أول مرة لم تحضر عند طلبك بيتم خصم شهرين من دخل المواطنة

2- تاني مرة لم تحضر عند طلبك بيتم خصم ٣ شهور من دخل المواطنة

3- تالت مرة لم تحضر عند طلبك بيتم خصم ٦ شهور من دخل المواطنة

4- رابع مرة لم تحضر عند طلبك بيتم وقف دخل المواطنة نهائياً

 

العقوبات المنتظرة لمن يحصل على دخل المواطنة بدون وجه حق

في حالة اكتشاف الإنبس أي شئ يدل على عدم احقيتك في الحصول علي دخل المواطنة :

– اولاً : بيتم وقف دفع فلوس دخل المواطنه فوراً .

– ثانياً :  سوف يطالب الإنبس بكل المال الذي اخذته REVOCA في حالة اكتشاف أي بيانات غير دقيقة من أول ما طلبك اتقبل.

– ثالثاً : اذا تغير  اي شئ في دخلك أو دخل اي فرد في الأسرة او حتى تغيير عنوانك (الريزيدنسا) لازم في خلال ٣٠ يوم من التغيير يتم اخطار الإنبس وإلا هيتوقف دخل المواطنة لما يكتشفوا وهيطالبوك بالفلوس اللي اخدتها من وقت ما حصل تغيير عندك بدون اخطارهم بالتغيير .

 

العقوبة الجنائية للتزوير او التحايل للحصول علي دخل المواطنة 

 

 

 تقديم بيانات خاطئة  لتتحايل عليهم للحصول على دخل المواطنة أو إنك تحاول خداعهم و تخفي عنهم شئ من ممتلكات ليك أو حساب بنكي أو أي دخل ليك .

 ملحوظة :

هتسألوا طب وهما هيكتشفوا إزاى هقولك مثلآ حظك السئ تكون شغال نيرو (اسود) عند حد وبالصدفه يحصل كنترول وده وارد جداً ويكتشفوا حصولك على دخل المواطنة و عقوبتها حبس وسجن. 

 

العقوبات الجنائية

 هي حبس مشدد من سنتين ل ٦ سنوات في حالة إنك تقدم بيانات مزورة ( يعني وانت بتملي بياناتك سواء لوحدك أو عن طريق كاف انت المسئول الأول والأخير عن أي حاجه بتقولها واي خطأ يعتبر تزوير منك).

 

– و حبس من سنه ل ٣ سنوات لأي حد هيحاول يخدع الإنبس ويخبي عنهم اي تغيير في بياناتك سواء دخل جديد لأي فرد في الأسرة أو أي تحايل على ممتلكات تخصك واخفائها عنهم.

 

ياريت الناس تراجع أوراقها كويس وهي بتقدم على اي شئ لإن آثار الأخطاء هتعود عليك انت بالمشاكل.

 

 كتب المقال :أ/ محمود عبيد