رخصة القيادة الإيطالية عن تجربة شخصية

رحلتى مع الرخصة الإيطالية

اول حاجة انا معايا الرخصة المصرية وبالطبع زيى زى اى حد اول اما وصلت
روحت اسأل ازاى احولها للرخصة لإيطالية أسوة بالجاليات الاجنبية هنا اللى بتحول رخصة بلدها عادى وكانت النتيجة ان الرخصة المصرية مينفعش تتحول لإيطالية عشان مصر بره معاهدة تحويل الرخصة واللى بتشمل كام بلد مصر مش من ضمنهم
وبالتالى قررت أسأل المصريين اللى حواليا اعمل ايه
وكل واحد كان برأى
اللى يقولى اعمل الدولية وامشى عادى
واللى يقولى ترجم المصرية وامشى عادى
واللى يقولى ملهاش حل الا انك تعمل الايطالية

طبعا كل رأى سألت فيه المرور الايطالى طمعا فى اى حل سهل يوفرالتعب والوقت
_________________________________________
اول حاجة الرخصة الدولية لما سألت قالولى الاتى
ينفع تمشى بيها سنة فى ايطاليا لو كنت زائر بس
او بمعنى تانى مش معاك ورق ايطاليا وليك محل اقامة ثابت فيها
_________________________________________________
تانى رأى انى اترجم الرخصة المصرية وامشى بيها
وقالولى مينفعش لأنها غير معترف بيها هنا اصلا
_______________________________________________
تالت حل “الرخصة الايطالية” ودى قصتنا انهاردا 😀

ودا بقى امر واقع بعد الردين اللى فوق دول انى مجبر اعملها لو عاوز اسوق فى ايطاليا وهى بالنسبة لغير الايطاليين تتسمى “مغامرة”
لأن حاليا معدش ينفع تعملها الا بالايطالى او الفرنساوى او الالمانى بعد ما كنت تقدر تعملها بالعربى لحد تقريبا 2009 وبالتالى كلها لغات غريبة علينا كعرب
وانا قررت اخوض المغامرة 🙂
قدمت فى مدرسة السواقة
واحتاجو منى
-carta di identità
-permesso di soggiorno
-3 foto
-certificato medico شهادة طبية بتعملها عند الدكتور بتاعك
او ممكن المدرسة توفرلك الدكتور دا بس بتدفع زيادة ..

بعد كدا بتدفع رسوم التسجيل
واما بتسجل بتبدأ تاخد حصص ودروس بقى عن الرخصة
طبعا كله ايطالى فى ايطالى ومحتاج تتابع وتذاكر اول بأول
الموضوع والله مش صعب
محتاج تتابع بس
شايفك انا ياللى هناك ياللى بتقولى بس انا معنديش وقت هتابع ازاى
الافضل انك تحضر خاصة لو انت نص ونص فى الايطالى زى حالاتى 🙂
لكن لو معندكش وقت خالص ممكن تسجل نفسك وتحاول تشترى الكتاب وتذاكر بقى فى البيت
كتاب الرخصة متقسم ابواب
ابواب الاشارات ودى حوالى 4 ابواب
وابواب الطرق ودى حوالى 3 ابواب
وباب الامان
وباب التخطى
وباب التأمين
وباب الموتور
و كام باب كدا تانيين المجمل انهم حوالى 26 باب
كلهم حاجات سهلة لو بتفهم ايطالى معقول
افضل حاجة انك تحل على كل باب لوحده بعد ما تذاكره والمدرسة بتديك اسئلة عموما ع فلاشة تحلها فى البيت
او لو انت مبتروحش المدرسة الاسئلة موجودة على النت
وبعد ما تخلص حل ع كل الابواب تبدأ تحل أسئلة عشوائية عليهم كلهم
والمدرسة برده بتديك برنامج للأسئلة العشوائية او ما يسمى ب ال”quiz”

طبعا انا بدأت الموضوع متحمس جدا سجلت فى شهر 2/2013
وكنت بحل ع طول على كل باب و احضر دروس
لحد ما جالى ملل فجأة وقعدت فترة مروحش المدرسة لأنى حسيت انها صعبة وزهقت ودا طبعا حاجة سلبية جدا كنت اتمنى معملهاش
المهم لحد ما لقيت المدرس بيقولى انت بقالك 6 شهور معانا وكدا لازم تمتحن 😀
طبعا حسيت انه بيقولى احنا هنرميك فى النار
بس الحمد لله صممت انى اذاكر تانى وبالفعل بدأت احل تانى “Quiz”
كتير جدا كان ممكن احل 4 او 5 فى اليوم مع ان مدة “Quizz” الواحد حوالى نص ساعة لكن مع الوقت اصلا الاسئلة بتتكرر وانت بتحفظها وممكن تخلص الامتحان فى 10 دقايق بس اهم حاجة انك متعملش اكتر من 4 غلطات فى الامتحان اللى هوه بيكون عبارة عن 40 سؤال فى مدة نص ساعة
__________________________________________________
ملحوظة :الامتحانات اللى انت بتحلها فى البيت او المدرسة هى اللى بتجيلك وانت بتمتحن للرخصة حتى نفس هيئة البرنامج

وبالفعل بعد حوالى 15 يوم روحت امتحن فى المرور بعد طبعا ما كنت جاهر وحالل اسئلة كتير جدا

وبالفعل الحمد لله ربنا كرمنى وعملت اول خطوة وعديت الامتحان النظرى وعملت غلطة واحدة بس 🙂

كدا مكنش ناقصلى الا الامتحان العملى اللى انا عملته بعد شهر ويوم
طبقا للفترة اللى حددها القانون الايطالى بين الامتحان النظرى والعملى
فى الفترة دى ليك 6 حصص سواقة اجبارية الحصة 30 دقيقة
بتتعلم فيهم السواقة لو مبتعرفش تسوق
وبتمارس فيهم السواقة فى ايطاليا لو انت اصلا بتعرف تسوق قبل كدا

بعد كدا روحت الامتحان العملى ركب جنبى اللى بيعلمنى فى المدرسة و ركب ع الكنبة اللى ورا مندوب المرور اللى بيمتحنك
طبعا دا بيوجهك وانت بتسمع كلامه ولو غلطت بتسقط
والاختبار عادى بيخليك تسوق عادى جدا ومش بيغلطك ولا حاجة زى الشائع ولو سوقت كويس بتعدى …
والحمد لله انا عديت 🙂

___________________معلومات هامة __________________

لو انت مبتعرفش ايطالى بلاش تغامر وتسجل حرام عليك ترمى فلوسك ع الارض

مصاريف الرخصة بتختلف من مدرسة للتانية انا دفعت حوالى 800 يورو

لما تروح المدرسة اسألهم ع كتاب الرخصة اللى كان بالعربى بتاع 2009 عشان مكتوب فيه الكلام بالايطالى وجنبه بالعربى
انت طبعا مش هتذاكر بالعربى بس عشان لو فى كلمة وقفت قصادك ولا حاجة تعرف ترجمتها 🙂

لو لا قدر الله سقطت فى العملى او النظرى ليك محاولة تانية

متروحش الامتحان الا وانت مذاكر كويس ومبتعملش ازيد من غلطتين ويفضل متعملش غلط خالص 🙂

لو حسيت انك مكسل تذاكر حمس نفسك عشان اللى اخد الرخصة قبلك مش احسن منك والرخصة سلاح من اسلحة الغربة

1. الموقع دا مهم لو نويت تاخد الرخصة
   http://www.rmastri.it/quiz-patente-b.php
2. وكمان دا
   http://www.mininterno.net/patente.asp
3. و دا
   http://www.patentati.it/quiz-patente-b.php
4. ودا

   http://www.scuolaguida.it/Quiz-patente-B/

   يارب تكونوا استفدتم حاجة واتمنى دعواتكم