🛑 طرق التقديم لامتحان النظرى 👇
- الأوراق اللازمة للتقديم
أهم خطوة الأول يكون عندك إقامة سارية على الأقل شهرين وبطاقة وتكون البيانات فى الاثنين متطابقة تماما حتى فى اسم بلد المنشأ - طرق واختيارات التقديم على امتحان الرخصة الإيطالية
🔴الاختيار الأول
انكم تقدموا تبع مدرسة وتاخدوا كورس النظرى والعملى معاهم وهما بيحددوا لكم مواعيد الامتحان وبيكون مكلف شوية فيما عدا محافظة روما التكلفة فيها بتكون اقل من نصف الثمن فى اى محافظة تانية .
وهنا كل المطلوب منكم تجيبوا certificato medico per la patente بمعنى تقرير طبى من الدكتور بتاعكم لعمل الرخصة وهما بعد كدا فى المدرسة هيكملوا لكم الاجراءات فى كشف النظر وحجز ميعاد الامتحان النظرى .
وفى حالة عدم اجتيازه بتدفع حوالى 150 يورو وتمتحن مرة ثانية ، وفى حالة النجاح بتعمل حصص العملى الاجبارية 6 ساعات وممكن تزود ويتراوح السعر تقريبا مابين 35 ل 45 يورو الساعة وتدفع تمن الامتحان العملى .
🔴 الإختيار الثانى
انكم تقدموا تبع المرور مباشرة وهنا التكلفة اقل فى الجزء النظرى .
- الإجراءات المتبعة للتقديم على الامتحان فى المرور
أولا / هتجيب تقرير طبى من الدكتور بتاعك او أى دكتور لحد من معارفك اسمه certificate medico per la patenta ودا بيبقى بفلوس وتقولوله يعملكم بيهم فاتورة تعملوا لها اسكاريكو فى الستاترنتا والتقرير دا ورقة عنده انك مش بتشرب كحوليات ولا مدمن مخدرات وماعندكش اعاقات تمنعك من السواقة او امراض مزمنة تؤثر على قدراتك الجسدية والنفسية المطلوبة
ثانيا / هتعملوا كشف نظر ودا بيكون فى الأزل او بريفاتو او الافضل aci ودا بتاخدوه فى نفس اليوم من غير مواعيد وتكلفته حوالى من 30 إلى 60 يورو والدكتور دا هياخد التقرير الطبى من الدكتور الخاص بك certificate medico per la patenta وصورتين شخصيتين يكون عندكم منها 4 متطابقين وماركة دى بولو ( وأحيانا بيجيبها هو ) ويعطيك تقرير جديد عليه صورتك ومكتوب فيه اذا كنت هتسوق بنضارة او لا .
ثالثا / هتروحوا البوسطة تطلبوا فواتير esame di teoria للرخصة وفى الغالب بيكونوا 2
واحدة بكود 4028 قيمتها 16 يورو
والثانية بكود9001 قيمتها 26,40 يورو
رابعا / ودى اخر خطوة هتروحوا motorizzazione ودا المرور التابع لكم
لو انتم تبع محافظات ميلانو او فاريزى هتنزلوا
أبليكشن mypushop وتحجزوا منه ميعادين .
الاول لتقديم الملف والأوراق وتاخدوا تقرير النظر والفواتير المدفوعة والاقامة والبطاقة وصورتين شخصيتين نفس اللى على تقرير النظر
والثانى لتحديد موعد الامتحان .
أما لو تبع أى محافظة تانية بتروحوا مباشرة أو تبعتوا ايميل وتسلموهم الورق وهيقولوا لكم تعالوا بعد شهر خدوا الميعاد ولما تروحوا بعد الشهر هيحددوا لكم
🔴ملحوظات هامة
لو محتاجين السماعة علشان تسمعوا السؤال وانتم بتحلوا بتقدموا طلب وتدفعوا 16 يورو زيادة وماركة دى بولو وتقولوا انكم غير متعلمين بس طبعا لو حد دارس هنا مستوى A2 او B هيرفضوا لانهم هيشوفوها على الكمبيوتر .
ملحوظة المرور اوفر من ناحية المادة ولأنه بيعطيكم بالفلوس دى فرصتين امتحان مش بس واحدة على عكس المدرسة اللى بتاخد فى المرة التانية لو مانجحتش ١٥٠ يورو زيادة .
