كتير مننا لما يجى يروح شغل جديد يبقى محتار فى موضوع الإتفاق على الشغل من حيث المقابل المادى !
مبدأيا خلينا متفقين إن الموضوع اللى هنتناوله إنهاردا هو موضوع إجتهادى
ولكن هنحاول نوضح لحضراتكم بعض من الضروريات المتبعة فى وضع بنود إتفاق فى الشغل بين العامل وصاحب العمل .
الإتفاق على الشغل بيتوقف على عدة معايير وهنقسمهم لنقط :
1-درجة إيجادتك ومدى إفادتك للشغل
2-نوع العمل
3- نشاط الشركة
4- حجم الشركة
5-ساعات الشغل
6-نوع العقد
7-الأجازات
8-سعر السوق
وهنتناولهم نقطة نقطة..
1- درجة إيجادتك ومدى إفادتك للشغل
كان لازم دى تكون أول نقطة عشان باقى النقط مترتبة عليها .
لازم تكون مؤهل كويس جداًً إنك تؤدى الشغل المطلوب منك و زيادة عشان أما تطلب فلوس معينة تبقى من جقك وتطلبها وإنت واثق من نفسك وأما تطلب رقم متغيروش واثبت عليه ولو هيبقى فى تفاوض إيجادتك للشغل وخبرتك بتخليك دايما الطرف الأقوى فى عملية التفاوض .
2- نوع العمل
نوع العمل بيتوقف عليه المرتب طبعا
*لأن لو حضرتك بتعمل شغل نادر ومطلوب أكيد مرتبك هيكون مرتفع أما لو بتعمل شغل فى ناس كتير بتعمله أو بالبلدى المعروض أكتر من المطلوب فمرتبك بيقل .
مثال : لو حضرتك شغال فى صيانة أجهزة الرادارات فى المطار مرتبك بيكون مرتفع ودا عشان المطلوب أكتر من المعروض
اما لو شغال فى البيتزا مثلا فالمرتب بيقل كتير عشان المعروض من اصنايعية أكتر من امطلوب فى السوق بكتير .
*لو حضرتك شغال بالليل “فجراً” زى الخباز مثلاً المرتب بيكون مدفوع أعلى من اللى بيشتغل بالنهار .
3-نشاط الشركة
نوع نشاط الشركة بيتوقف عليه المرتب بشكل كبير
يعنى لو الشركة شغالة فى التكنولوجيا المرتب المتفاوض عليه بيكون أعلى من إن الشركة تكون شغالة فى الطباعة مثلاً وهكذا.
4- حجم الشركة
الإتفاق على المرتب مرتبط أيضا بحجم الشركة فى مجالها
فلو مثلاً هتشتغل فى شركة آبل مرتبك مش هيكون زى لو اشتغلت فى شركة موتورولا وهكذا مع ان الاتنين بيصنعوا تليفونات وأجهزة إلكترونية .
5- ساعات العمل
يرتفع المرتب بزيادة ساعات العمل
يعنى لو هتشتغل 4 ساعات مش زى ما هتشتغل 8 ساعات أو تعمل ساعات إكسترا
6-نوع العقد
هل هو عقد نصف دوام ولا دوام كامل مفتوح ولا محدد المدة درجتك الوظيفية فيه إيه “مبتدأ, موظف,عامل,……إلخ”
7- الأجازات
هل هى أجازات كاملة وقانونية .. عدد أيام الأجازة و مدة الأجازة السنوية
8- سعر السوق
ودى نقطة هامة جدا لازم قبل ما تروح تتفق على شغل تكون عارف الشغل دا متوسط مرتباته فى سوق العمل كام ومتتنازلش أبداً وتقلل من نفسك وتطلب أقل من سعر سوق العمل عشان مترخصش نفسك فى المستقبل زى ما ناس كتير بتتفق بمبالغ قليلة جدا وتتفاجئ إنها إتنازلت وبعد كدا بيبقى فى مشاكل فى شغلهم كتير للأسف .
كل اللى ذكرناه مرتبط إرتباط وثيق بتقدير المرتب المطلوب مقابل العمل يستثى من الكلام دا الناس اللى شغالة نيرو “بدون عقد”.
ونصيحة أخيرة ..
عشان تبقى مالك أمرك فى الإتفاق لازم تكون مؤهل بجد وقوى فى مجالك عشان متضطرش تقبل بأى عرض بالعكس تبقى إنت الجبهة الأقوى فى الإتفاق على المرتب وبالتوفيق للجميع
