انهارده هنتكلم عن موضوع بيهم كل الاسر المصرية المغتربة في إيطاليا وهو موضوع متابعه الحمل خصوصا ان في مصريات كتير لما وصلت من مصر وصلها معلومات غلط عن الموضع دا -و إلى حضراتكم شرح كامل بشكل مبسط عن متابعة الحمل من البداية وحتى مرحلة الوضع .
أولا
بداية لو عرفت ان المدام حامل روح للدكتور بتاعكم قوله انها حامل (انشينتا)وعايزه تعمل فيزيتا هيعملك روشته(امبنياتيفا)تروح تحجز بيها ميعاد في المستشفى لمتابعه الحمل
ثانيا :خطوات هامة يجب إتباعها فى بدايات الحمل
1-معرفه كل الامراض اللى بتتعالج منها المدام بالايطالى او الانجليزى ولو كانت بتتعالج في مصر خلى الدكتور اللى بتتعالج معاه يعملها تقرير بالانجليزى وكل العمليات الجراحيه اللى عملتها
2-خدمعاك روشتات كل الادويه اللى بتاخدها المدام ولو ادويه مصريه تكون الروشته بالانجليزى
3-معرفه كل الامراض المزمنه لابو وام المدام بالايطالى او الانجليزى
4-اتاكد في نهايه المقابله ان الدكتوره عملتلك 5 روشتات (امبنياتيفا)وهما واحده للميعاد التالى والتانيه للتحاليل اللى هتعملها المدام قبل الميعاد التالى والتلاته اللى فاضلين علشان تحجز مواعيد الاشعه التليفزيونيه لانك لو اتاخرت في حجزهم هتتبهدل في المستشفيات
5-لو المدام ولدت قبل كده قيصرى تعرف ايه السبب واتولد المولود بعد كام أسبوع معلومات هامة
لو الحمل طبيعى والمدام معندهاش مشاكل بيكون في زياره كل شهر او شهر ونص ولو المدام تعبت في النص بتروح المستشفى بيدخلوك على طول
بس نتمنى قبل متروح المستشفى تتصل بوالدتك او والده المدام ولو قالولك انه تعب عادى وبيحصل للحوامل يبقى متروحش احسن ملاحظات هامة :
كل المتابعات والاشعه التليفزيونيه بالمجان للحامل واكتر من 90% من التحاليل ببلاش يعنى ممكن طول فتره الحمل متدفعش 10 ولا 20 يورو تزيد او تقل شويه على حسب التحاليل المطلوبه
لو المدام جايه حامل خليها تجيب معاها كل التحاليل اللى عملتها في مصر وتقرير من الدكتوره اللى بتعالجها واعمل حسابك انك هتدفع في التحاليل من 50 ل 100 يورو.
في نهايه الحمل افتكر في الشهر السابع لو المدام هتولد قيصرى تفكرهم علشان يدوك ميعاد تروح تحجز فيه ميعاد الولاده وميعاد الريكفرى
الريكفرى للستات اللى هيولدو قيصرى بيكون قبل الولاده بفتره قليله بتروح المستشفى يعملو تحاليل سريعه ويقيسو ضربات القلب للجنين وتعمل فيزيتا وفى الاخر بتقابل دكتور التخدير وتحدد معاه انت عايز بنج كلى او نصفى متنساش المدام تروح صايمه من نص الليل وتاخد معاك اكل وعصير علشان تفطرها بعد التحاليل
يوم الولاده القيصرى بتروح بدرى والمدام صايمه بتجهز معاك التالى :
1-لبس المدام في المستشفى
2-لبس المولود 4 غيارت على الأقل وفنلات داخليه للمولود بنص كم في الشتا وبنص وحمالات في الصيف
3-جهز اسم المولود في ورقه نومى وكونيومى
بعد المدام متخرج من العمليات بالسلامه هيدوك ورقه تاخدها تملاها علشان تروح تانى يوم بيها على الكمونه وتطلع شهاده الميلاد والكودتش فيسكالى من الكمونه وتاخدهم وتروح على الازل تطلع ليبرتو سانتاريا للمولود
-وتابع الموقع هنا عشان تعرف المساعدات اللى هتقدم عليها للمولود والورق المطلوب علشان تضيفه على البيرميسو
المدام بتقعد حوالى 3 ليالى وبتمشى قبل الساعه 10 في اليوم الرابع ممكن تودى لها اكل وشرب في المستشفى عادى نصيحه هامه جدا للرجاله
لو انت معندكش مشاكل تغير للمولود يبقى انت كده تمام ربنا يوفقك لكن لو بتقرف يبقى شوفلك حجه تهرب بيها من ممرضات النيدو علشان هيندهولك غصب ويعلموك تغير للطفل معلومات هامة للسيدات
-الولاده الطبيعى طبعا مفيهاش اى مشاكل بامر الله وبتروحى وقت ما تحسى بقرب الولاده ده غير انهم بيبقو محددين قبلها تقريبا
-كل الإدعاءات عن انهم مبيفهموش والصعوبه و ده كله إشاعات و المعامله مستحيل تلاقيها في انضف مستشفى 5نجوم في مصر
وأخيرا نتمنى لحضراتكم الإستفادة الكاملة
